احتساب عدالت کی حسن اور حسین نواز کے شیئرز منجمد کرنے کی ہدایت

اسلام آباد: احتساب عدالت نے نوازشریف کے دونوں صاحبزادوں حسن اور حسین نواز کے مختلف کمپنیوں میں شیئرز منجمد کرنے کی ہدایت کردی۔

اسلام آباد کی احتساب عدالت نے نیب ریفرنس میں عدم پیشی پر سابق وزیراعظم نوازشریف کے صاحبزادوں کے ناقابل ضمانت وارنٹ جاری کررکھے ہیں جب کہ عدالت نیب ریفرنسز میں میاں نوازشریف، مریم نواز اور کیپٹن (ر) صفدر سمیت اسحاق ڈار پر بھی فرد جرم عائد کرچکی ہے۔

نیب ریفرنسز میں حسن اور حسین نواز مفرور ملزم قرار

اسلام آباد کی احتساب عدالت کے نوٹس بورڈ پر دونوں کا اشتہار چسپاں کردیا گیا

جیونیوز کے مطابق احتساب عدالت میں حسن اور حسین نواز کے خلاف نیب ریفرنسز پر سماعت ہوئی جس میں نیب حکام نے دونوں ملزمان کے اثاثوں سے متعلق رپورٹ پیش کی جس میں بتایا گیا کہ ایس ای سی پی کے مطابق حسن اور حسین نواز کے 6 کمپنیوں میں شیئرز ہیں۔

عدالت نے نیب کی رپورٹ کے بعد ایس ای سی پی کو حسن اور حسین نواز کے شیئرز منجمد کرنے کی ہدایت کردی۔

جب کہ عدالت نے دونوں مفرور ملزمان کو اشتہاری قرار دینے کی کارروائی بھی شروع کردی ہے اورکہا گیا ہےکہ دونوں ملزمان اگر 8 نومبر تک پیش نہ ہوئے تو انہیں اشتہاری قرار دے دیا جائے گا۔

نیب ریفرنسز سیاسی انتقام کے علاوہ اور کچھ نہیں، حسن نواز

ایسا کوئی کام نہیں نہ پاکستان سے فرار ہوا ہوں جس پر اشتہاری قرار دیا جائے، نمائندہ جیونیوز سے خصوصی گفتگو

احتساب عدالت نے کیس کی مزید سماعت 14 نومبر تک ملتوی کردی۔

واضح رہےکہ نیب نے پاناما کیس کے فیصلے کی روشنی میں شریف خاندان کے خلاف العزیزیہ اسٹیل مل، فلیگ شپ انویسٹمنٹ اور لندن فلیٹس سے متعلق تین ریفرنس دائر کیے ہیں۔