کراچی...........اعلیٰ ثانوی تعلیمی بورڈ کے ناظم امتحانات محمد عمران خان چشتی نے بورڈ آف سیکنڈری ایجوکیشن کراچی سے میٹرک کے ضمنی امتحانات 2014ء میں کامیاب ہونے والے ان امیدواروں کیلئے جو انٹرمیڈیٹ حصہ اول کے سالانہ امتحانات برائے 2015ء میں شرکت کے خواہشمند اور اہل ہیں امتحانی فارم جمع کروانے کی تاریخوں کا اعلان کردیا ہے۔ انہوں نے کہا کہ ایسے تمام امیدوار انٹرمیڈیٹ حصہ اول کے تمام گروپس سائنس پری میڈیکل، پری انجینئرنگ، سائنس جنرل، کامرس ریگولر، آرٹس ریگولر، ہوم اکنامکس، کامرس پرائیویٹ اور آرٹس پرائیویٹ کیلئے امتحانی فارم جمع کرواسکتے ہیں۔ محمد عمران خان چشتی نے کہا کہ تمام ریگولر امیدوار اپنے امتحانی فارم اپنے کالجوں کے پرنسپلز سے تصدیق کے بعد بورڈ آفس کے اکائونٹس سیکشن میں جبکہ پرائیویٹ امیدوار اپنے امتحانی فارم متعلقہ سیکشن سے ضروری تصدیق کے بعد بورڈ میں واقع بینک برانچ میں جمع کرواسکتے ہیں۔ انہوں نے بتایا کہ مذکورہ امتحانی فارم جمعرات 12فروری سے 27فروری تک جمع کروائے جاسکتے ہیں۔ ناظم امتحانات محمد عمران خان چشتی نے مزید بتایا کہ جو امیدوار مقررہ تاریخوں تک اپنے امتحانی فارم جمع نہ کرواسکیں وہ اپنے فارم بروز پیر 2مارچ سے 6 مارچ تک 200 روپے لیٹ فیس کے ساتھ، 9 مارچ سے 12 مارچ تک 500روپے لیٹ فیس کے ساتھ جبکہ 13مارچ سے 18مارچ تک 1000 روپے لیٹ فیس کے ساتھ جمع کرواسکتے ہیں۔