اسلام آباد ہائی کورٹ نے میمو گیٹ اسکینڈل کے مرکزی کردار منصور اعجاز کے خلاف مقدمہ درج کرنے اور پاکستان سے واپسی رکوانے کیلئے دائر درخواست ناقابل سماعت قرار دے کر خارج کردی ہے۔ اسلام آباد ہائی کورٹ کے جسٹس محمد انور خان کاسی نے ایک شہری شاہد اورکزئی کی جانب سے دائر درخواست کی سماعت کی، جس میں موٴقف اختیار کیا گیا تھا کہ منصور اعجاز متنازع میمو مائیک مولن تک پہنچانے کا اعتراف کر چکا ہے۔ خفیہ میمو کی ترسیل پاکستان کے خلاف سازش ہے۔ اس لئے عدالت سیکریٹری خارجہ کواحکامات جاری کرے کہ پاکستان آمدکی صورت میں منصور اعجاز کی واپسی کو عدالت کی اجازت سے مشروط کیا جائے۔