لندن......متحدہ قومی موومنٹ کے قائد الطاف حسین کی صدارت میں ایم کیوایم کی رابطہ کمیٹی لندن اورپاکستان کے ارکان کا مشترکہ اجلاس ہوا جس میں ایم کیوایم کے مرکز نائن زیروپر تنظیمی امور انجام دینے والے مختلف شعبہ جات کے انچارجز اور اراکین نے بھی شرکت کی ۔ اجلاس کے تمام شرکاء نے اپنی نشستوں سے کھڑے ہوکر سانحہ صفورا چورنگی کے شہداء کی یاد میں ایک منٹ کی خاموشی اختیار کی گئی اور شہداء کو زبردست خراج عقیدت پیش کیا ۔اجلاس سے خطاب کرتے ہوئے الطاف حسین نے اسماعیلی کمیونٹی کے افراد کا بہیمانہ قتل عام ایسا غم ہے جوکہ ناقابل تلافی ہے، انہوں نے پاکستان میں بسنے والی اسماعیلی کمیونٹی سے کہاکہ سانحہ صفورا چورنگی کے المناک واقعہ پر مجھ سمیت ایم کیوایم کا ایک کارکن آپ کے غم میں برابر کا شریک ہے ۔ الطاف حسین نے اسماعیلی برادری کے روحانی پیشواپرنس کریم آغاخان سے دردمندانہ اپیل کی کہ وہ کراچی میں اسماعیلی برادری کے قتل عام کا معاملہ اقوام متحدہ کے سیکریٹری جنرل ، ایمنسٹی انٹرنیشنل اورایشیا واچ سمیت ہرسطح پراٹھائیں اور پوری دنیا کو آگاہ کریں کہ پاکستان میں پرامن اور بے ضرر اسماعیلی برادری کو قانون نافذ کرنے والے اداروں کے اہلکاروں کی بڑی تعداد میں موجودگی کے باوجود طالبان ، القاعدہ اور داعش کے دہشت گرد دن دیہاڑے مسلح حملے کرکے درجنوں افراد کو شہید وزخمی کرکے آسانی سے فرارہوجاتے ہیں ۔انھوں نے پرنس کریم آغاخان اورپوری دنیا میں بسنے والی اسماعیلی برادری کے افراد سے اپنی اورایم کیوایم کی جانب سے دلی تعزیت کااظہارکرتے ہوئے دعا کی کہ اللہ تعالیٰ سانحہ صفوراچورنگی میں جاں بحق ہونے والے افراد کو شہادت کا درجہ عطا کرکے جنت الفردوس میں اعلیٰ مقام عطافرمائے ،مرحومین کی ارواح کوسکون دے اور دہشت گردی کے واقعہ میں زخمی ہونے والوں کو جلدومکمل صحت یابی عطا کرے ۔ الطاف حسین نے حکومت سے مطالبہ کیا کہ اسماعیلی برادری کے سفاک قاتلوں کی گرفتاری میں کوئی کسر اٹھانہ رکھی جائے اور تمام شہریوںکو بلاامتیاز وتفریق جان ومال کاتحفظ فراہم کیاجائے ۔