لاس اینجلس......متحدہ قومی موومنٹ امریکہ اور آسٹریلیا کے زیراہتمام سانحہ صفورا گوٹھ میں بے گناہوں کو انتہائی سفاکی اور بیدردی سے شہید کئے جانے کے خلاف علیحدہ علیحدہ تعزیتی اجلاسزکا انعقاد کیا گیا جس میں سانحہ صفورا کے شہداء کیلئے فاتحہ خوانی کی گئی جبکہ اجلاسزکے شرکاء نے شہداء کی یاد میں شمعیں بھی روشن کیں ۔ایم کیو ایم امریکہ کے زیر اہتمام لاس اینجلس جبکہ ایم کیو ایم آسٹریلیا کی جانب سے سڈنی اور میلبورن میں منعقد ہونیوالے تعزیتی اجلاسوں میں مختلف شہروں سے تعلق رکھنے والے پاکستانی کمیونٹی کی خواتین ،مرد اور نوجوانوں نے بڑی تعداد میں شرکت کی ۔ لاس اینجلس کے اجلاس میں اس افسوسناک سانحہ کے خلاف متفقہ قرار داد بھی منظور کی گئی جس میں پاکستانی حکومت سے مطالبہ کیا گیا کہ وہ سانحہ میں ملوث عناصر کو فی الفور گرفتار کرے اور انہیں قرار واقعی سزا دے۔اجلاس سےسابق وفاقی وزیر سینیٹر بابر غوری نے خطاب کرتے ہوئے کہا کہ سانحہ صفورا کی جتنی بھی مذمت کی جائے کم ہے ، حکومت اگر دبائو سے باہر ہوکر تمام انتہاء پسندوں کے خلاف کاروائی کرے تو یقینا پاکستان ایک پرامن اور مثالی ملک بن سکتا ہے ، نیشنل ایکشن پلان میں صوبوں کیلئے رقم رکھی جاتی ہے ، سندھ کو وفاق سے 56ارب روپے ملتے ہیں اور سندھ کی آبادی اگر ساڑھے 4کروڑ تصور کرلی جاے تو کراچی کی آبادی ڈھائی کروڑ ہے جبکہ ان پیسوں میں سے کراچی کی ترقی کیلئے آدھی رقم بھی رکھی جائے تو کراچی دنیا کا خوبصورت ترین شہر بن سکتا ہے لیکن افسوس کے ساتھ کہنا پڑتا ہے کہ کراچی کو صرف 3ارب روپے ملتے ہیں ۔ انہوں نے کہاکہ اختیارات ایک شخص کے ہاتھ میں ہونے سے مسائل بڑھتے ہیں ، اختیارات کی تقسیم اگر منتخب نمائندوں کے ہاتھ میں ہو تو شہر اور ملک ترقی کرتے ہیں،پاکستان میں جاری آپریشن انتہاء پسندوں کے بجائے سیاسی جماعتوں کے خلاف ہوگیا ہے اور کرمنلز کے بجائے سیاستدانوں کو نشانہ بنایاجارہا ہے جس سے ملک میں بے چینی کی فضا پھیل رہی ہے ۔انہوں نے کہا کہ الطا ف حسین کا پیغام حق اور سچ پر مبنی ہے ،الطا ف حسین کے چاہنے والے جہاں بھی ہوں وہ یکجہتی کا بے مثال نمونہ پیش کرتے ہیں ۔جبکہ سڈنی اور ملبورن میں منعقدہ تعزیتی اجلاسز میں شہداء صفورا گوٹھ کیلئے خصوصی دعا اور شمعیں روشن کرکے انہیں خراج عقیدت پیش کیا گیا ۔