کراچی..........کراچی کے مختلف علاقوں میں غیر قانونی طور پر قائم 4شادی ہالز کو مسمار کردیا گیا۔ تفصیلات کے مطابق وزیربلدیات شرجیل میمن ایک بار پھر نکلے اور غیر قانونی شادی ہالز کے خلاف آپریشن پر اور 4غیر قانونی شادی ہالز مسمار کرا دیے۔ پہلا پڑاو تھا ایف بی ایریا میں قائم غیر قانونی شادی ہال، وزیر بلدیات او ر ضلعی انتظامیہ کی موجودگی میں بلدیہ عظمیٰ کی مشینری نے غیر قانونی ہال کی اینٹ سے اینٹ بجا دی۔ دیواریں منہدم کرنے کے بعد شرجیل میمن نے میڈیا سے گفتگو میں کہا کہ پنجاب میں پیپلز پارٹی سے استعفی ٰدینے والوں نے جلد بازی سے کام لیا ہے۔ انہوں نے خبردار کیا کہ غیر قانونی شادی ہال مالکان رضا کارانہ طور پر دستبردار ہو جائیں ورنہ قانونی کارروائی ہوگی۔ ایف بی ایریا کے بعد عزیزآباد اور سوک سینٹر کے قریب قائم مزید 3غیر قانونی شادی ہالز بھی مسمار کر دیے گئے۔ عزیز آباد میں شادی ہال مالک نے بتایا کہ عدالت کے حکم امتناع کے باوجود ان کا ہال مسمار کر دیا گیا۔ حکومت کارروائی سے پہلے وارننگ دے تاکہ گیہوں کے ساتھ گھن نہ پسے۔ ادھر متحدہ کی رابطہ کمیٹی کا کہنا تھا کہ دیگر شہروں میں بھی غیر قانونی شادی ہال ہیں، مگر کراچی کو نشانہ بنایا جا رہا ہے۔