ہالی وڈ..........ہالی وڈ کی تھرل سے بھرپور نئی سپر ہیرو سائنس فکشن ایکشن فلم ’آنٹ مین‘ کا ٹریلر جاری کر دیا گیا ہے۔ ہدایت کار پیٹون ریڈ کی اس سنسنی خیز فلم کی کہانی ہینک پائم نامی ایک نہایت ذہین سائنسدان کے گِرد گھوم رہی ہے، جو ایسا مادہ تیار کرتا ہے، جس کے استعمال کے بعد نہایت آسانی سے جسمانی حجم میں تبدیلی ممکن ہو جاتی ہے۔ اسی مادے کی بدولت غیر معمولی صلاحیتوں کا مالک آنٹ مین دشمنوں سے مقابلے کے لیے میدان میں آتا ہے اور ایک ایک کرتے ہوئے اپنے تمام دشمنوں کو کچل ڈالتا ہے۔ کیون فیج کی پروڈیوس کردہ اس فکشنل کامک بک سپر ہیرو فلم میں مرکزی کردار ہالی وڈ اداکار پال روڈ نبھا رہے ہیں، جن کے علاوہ فلم کی دیگر کاسٹ میں ایوینجلین لِلی، مائیکل ڈوگلس، جورڈی مولا، مائیکل پینا، وڈ ہیرس، ہیلے ایٹ ویل اور جوڈی گریئر شامل ہیں۔ مارول اسٹوڈیوز کے اشتراک سے بننے والی مار دھاڑ سے بھرپور مناظر کی عکاسی کرتی، اس سائنس فکشن تھرل فلم کو والٹ دزنی اسٹوڈیوز اور موشن پکچرز کے تحت رواں سال 17جولائی کو سنیما گھروں میں نمائش کے لیے پیش کردیا جائے گا۔