کراچی .......قرآن کتاب ہدایت ہے،جس نے قرآن کو تھام لیا وہ فلاح پا گیا،امت مسلمہ کی نجات کا واحد ذریعہ قرآن ہے،قرآن ایسا چراغ ہے جوبجھنے والا نہیں،قرآن مکمل ضابطہ حیات ہے قرآن پر عمل کر کے ہی ہم اپنے سیاسی،اجتماعی،معاشرتی مسائل کو حل کر سکتے ہیں،ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نےجشن نزول قرآن کے حوالے سے اپنے بیان میں کیا ۔ان کا کہنا تھا کہ خالق کائنات نے قرآن کی صور ت میں آئین زندگی خاتم الانبیا ء محمد مصطفیٰٰ کے قلب اطہر پر اتارا ،اس میں ہمارے ہر مسئلہ کا حل ہے،قر آن بیدار ی کاپیام ہے،قرآن وحدت کا پیغام ہے،قرآن سے انس و محبت کرنا خدا اور رسول و اہلبیت اطہارعلیہ السلام سے عشق و محبت کرنا ہے،جس نے قرآن کو اپنا لیا اسے صحرائوں اور پہاڑوں میں بھی رہنمائی ملے گی،جس نے قرآن کو پس پشت ڈال دیا اس نے ہلاکت و تباہی کو اپنے اوپر مسلط کرلیا۔ مسلم امہ اگرقرآن کو اپنے لئے آئین و دستور بنائیں تو دنیا کا نقشہ تبدیل ہوسکتا ہے،قرآن نکتہ اتحاد امت اورا ورحدت المسلمین کا آئینہ دار ہے،ہماری بدقسمتی ہے کہ ہم پر وہ حکمران مسلط ہیں جنہوں نے قرآن کو پس پشت ڈال رکھا ہے اگراسلامی ممالک کے حکمران قرآن کی پیروی کرتے تو امت مسلمہ اس طرح رسوا نہ ہوتی۔ قرآن کی سب سے بڑی خصوصیت یہ ہے کہ اس کی حفاظت کی ذمہ داری خدا نے لی ہے ،قرآن کااپنی اصل شکل میں موجود ہونا ہمارے لیئے باعث فخر و اطمینان ہے وگرنہ دوسری آسمانی کتابوں میں وقت کے ساتھ ساتھ تبدیلیاں آ چکی ہیں ،قرآن اسی شکل میں موجود ہے جس شکل میں قلب اطہر رسول آخر ﷺپر نازل ہوا،انہوں نے متوجہ اور خبردار کرتے ہوئے کہا کہ جو لوگ قرآن کے متن میں تمام تر سازشوں کے باوجود تحریف نہیں کر سکے وہ آج اس کی غلط و من مانی تعبیر کے ذریعے تحریف کے ایجنڈے پر عمل پیرا ہیں،انہوں نے کہا کہ امت مسلمہ کو ایسے تکفیری و اسلام دشمن ایجنٹوں کی سازشوں کو سمجھنا ہو گا اور انہیں ناکام بنانے کی حکمت عملی بنانا ہو گی۔