اسلام آباد........ وفاقی وزیر احسن اقبال کا کہنا ہے کہ دو ہزار تیرہ میں فوربس میگزین نےپاکستان کوخطرناک ملک قراردیاتھا، دو ہزار پندرہ میں پاکستان کواگلی کامیاب اسٹوری قراردیا، دو سال میں کراچی کے حالات اور بلوچستان کی صورتحال بہتر ہوئی ہے جس کا مطلب ہےتبدیلی آگئی ہے۔

سی ای اوز ایوارڈ کی تقریب سے خطاب میں احسن اقبال کا کہنا تھا کہ پاک چائنا اکنامک کوریڈور میں 6 ارب ڈالرآسان قرض لے کر پاکستان خود سرمایا مہیا کرے گا جبکہ بقیہ 40 ارب ڈالر چین کی کمپنیاں سرمائے کے طور پر لگائیں گی۔ انہوں نے کہا کہ چین پاکستان میں براہ راست سرمایا لگانے والا سب سے بڑا ملک بن چکا ہے۔

احسن اقبال کا کہنا تھا کہ 2013 میں فوربز میگزین نے پاکستان کو خطرناک ملک قرار دیا اور اب یہی میگزین کہتا ہے کہ پاکستان ترقی کی مثال بننے جارہا ہے، 2013 کے مقابلے کراچی سمیت پورے ملک میں امن بہتر ہے، اسکا مطلب ہے کہ تبدیلی آگئی ہے۔

سی ای اوز کانفرنس کے موقع پر تعلیمی ماہرین کا کہنا تھا کہ کامیابی کی انفرادیت کو پھیلا کر ملکی سطح پر لانا ضروری ہے۔ ایوارڈ تقریب میں مختلف کمپنیز کے سی ای اوز کو بہترین قائدانہ صلاحتیوں کے اعتراف میں ایوارڈز سے نوازا گیا۔