ہالی وڈ........ہالی وڈ کے دو نامور سپر ہیرو بیٹ مین اور سپر میں ایک ساتھ بڑی اسکرین پر جلوہ بکھیرنے کو تیار ہیں، اسی سلسلے میں ایکشن اور تھرل سے بھرپور سنسنی خیز فلم ’بیٹ مین ورسز سپر مین- ڈان آف جسٹس‘ کا نیا ٹریلر بھی منظرِ عام پر آگیا ہے۔

ہدایتکار زیک سنیڈر کی اس فلم میں 41سالہ اداکار بین ایفلک بیٹ مین اور سپر مین کا کردار ہینری کاویل نبھائیں گے، جبکہ فلم کی دیگر کاسٹ میں گال گیڈوٹ، ایمی ایڈمز، ڈیانے لین، لارنس فش برن، جیسی ایسنبرگ، ہالی ہنٹر اور جیریمی آئرنز شامل ہیں۔

ڈیبورا سینڈر اور چارلس روون کی پروڈیوس کردہ اس فلم کی کہانی غیر معمولی طاقت اور انوکھی صلاحیتوں کے مالک 2ایسے ہیروز کے گِرد گھوم رہی ہے، جو انصاف کے تقاضوں کی تکمیل اور عوام کی حفاظت کے لیے بڑے سے بڑے خطرے سے ٹکرا جاتے ہیں۔

ہدایتکار زیک کے مطابق ایکشن سے بھرپور یہ سنسنی خیز ایڈونچر فلم وارنر بروس پکچرز کے تحت آئندہ سال 25مارچ کو مداحوں کے لیے سنیما گھروں کی زینت بنائی جائے گی، جس میں بیٹ مین فرنچائز کی گزشتہ فلموں سے زیادہ ایکشن، تھرل اور کرائم موجود ہے جو دیکھنے والوں کو اپنا دیوانہ بنا لے گی۔