پیرس......رضا چوہدری......صحافیوں کی عالمی تنظیم ’رپورٹرز ود آوٴٹ بارڈرز‘کے سیکریٹری جنرل کرسٹوفر ڈیلوا نے مطالبہ کیا ہے کہ صحافیوں کے تحفظ کے لیے اقوام متحدہ کے سیکریٹری جنرل کا خصوصی نمائندہ مقرر کیا جائے۔

آرایس بی کی جانب سے جاری اعداد و شمار کے مطابق رواں برس دنیا بھر میں 110 صحافی ہلاک ہوئے جن میں سے 67 صحافیوں کواپنے پیشہ ورانہ فرائض کی ادائیگی کے دوران نشانہ بنایا گیا۔

آر ایس بی نے صحافیوں کی ہلاکتوں پر شدید تشویش کا اظہار کرتے ہوئے ہنگامی بنیادوں پر ان کے تحفظ کے لئے فوری اقدامات اٹھائے جانے کا مطالبہ کیا ہے۔

تنظیم کا کہنا ہے کہ صحافیوں کو نشانہ بنائے جانے کی ایک بڑی وجہ یہ ہے کہ صحافیوں کے تحفظ کے لیے اٹھائے گئے اقدامات کی ناکامی ہے جس کے سبب2005 سے اب تک 787 صحافیوں کو ہلاک کردیا گیا۔

آر ایس بی کا کہنا ہے کہ رواں برس ہلاک ہونے والے 110 صحافیوں میں سے 43 کی ہلاکتوں کے بارے میں یہ پتہ نہیں لگایا جا سکا کہ انھیں کام کے باعث نشانہ بنایا گیا ہے یا کسی اور سبب۔

تنظیم کے مطابق 2015 میں ایک بار پھر یہ ثابت ہو گیا ہے کہ صحافت ایک خطرناک شعبہ ہے۔ رواں برس ہلاک ہونے والے 110 صحافیوں میں سے 40 فیصد کو شدت پسند تنظیموں داعش اور القاعدہ نے نشانہ بنایا۔

شام اور عراق صحافیوں کے لیے خطرناک ترین ملک ثابت ہوئے لیکن وہاں کے حالات کو مد نظر رکھتے ہوئے یہ باعث حیرت نہیں ہے۔ تاہم فرانس میں رواں برس جنوری میں فرانسیسی میگزین ’چارلی ایبڈو‘ پر شدت پسندوں کے حملے میں اتنی بڑی تعداد میں صحافیوں کی ہلاکت ضرور باعث تشویش ہے۔

عراق، شام اور انڈیا کے بعد رواں برس سب سے زیادہ صحافی فرانس میں ہی ہلاک ہوئے۔شام میں گزشتہ سال کی نسبت رواں برس کم صحافی ہلاک ہوئے لیکن اس کی ایک وجہ یہ ہے کہ میڈیا تنظیمیں اب نہ صرف وہاں بلکہ عراق اور لیبیا میں بھی اپنے رپورٹرز کو بھجوانا خطرے سے خالی نہیں سمجھتیں۔

آر ایس بی کے سیکریٹری جنرل کرسٹوفر ڈیلوا کا کہنا ہے کہ صحافیوں کے تحفظ کے لیے موجود بین الاقوامی قوانین کے نفاذ کے لیے مکینزم بنانا انتہائی ضروری ہو چکا ہے۔انھوں نے مطالبہ کیا کہ صحافیوں کے تحفظ کے لیے اقوام متحدہ کے سیکریٹری جنرل کا خصوصی نمائندہ بلاتاخیر مقرر کیا جائے۔

ان کا کہنا تھا کہ صحافیوں کے تخفظ کے لیے رواں برس چھ اگست کو اقوام متحدہ کی سالانہ رپورٹ میں سیکریٹری جنرل بان کی مون نے صحافیوں کی ہلاکتوں کے خلاف تشدد میں اضافے کو روکنے اور مجرموں کو سزا نہ ملنے پر تشویش کا اظہار کیا تھا۔

آر ایس بی گزشتہ 20 برس سے صحافیوں کے خلاف تشدد اور ان کی ہلاکتوں پر مبنی رپورٹ جاری کرتی آئی ہے۔ ایک اور عالمی صحافتی تنظیم کمیٹی ٹو پروٹیکٹ جرنلسٹس بھی آج اسی موضوع پر اپنی رپورٹ جاری کرے گی۔