ہالی وڈ کی خوف اور دہشت سے بھرپور فلم ’دی کنجیورنگ‘ کے سیکوئل ’دی کنجیورنگ2 دی اِنفیلڈ پولٹر گیِسٹ‘ کا سنسنی خیز ٹریلر جاری کردیا گیا ہے۔ جو 10جون کو سنیما گھروں کی زینت بننے کے لیے تیار ہے۔

2013میں سنیما گھروں میں خوف اور دہشت پھیلانے والی ’دی کنجیورنگ‘ کا سیکوئل ’دی کنجیورنگ2 دی اِنفیلڈ پولٹر گیِسٹ‘ تیار کر لیا گیا ہے۔

اسی سلسلے میں نئی ہالی وڈ ہارر فلم کا سنسنی خیز ٹریلر بھی جاری کر دیا گیا ہے۔ حقیقی واقعات کی عکاسی کرتی اس سنسنی خیز فلم کو جیمز وان نے ڈائریکٹ و پروڈیوس کیا ہے۔

فلم کی کہانی شیطانی ارواح کے زیرِ اثر جنگل میں موجود ایک ایسے گھر کے گِرد گھوم رہی ہے جہاں غیر مّرئی قوتیں اور مافوق الافطرت مخلوق اپنی موجودگی کا احساس دلانے کیلئے ایسے ایسے حربے استعمال کرتی ہیں کہ تمام خاندان کی جان خطرے میں پڑ جاتی ہے۔

ڈراؤنے مناظر اور دِل دہلا دینے والے واقعات پر مبنی اس فلم میں اہم کرداروں میں ہالی وڈ اداکار پیٹرک وِلسن،وارا فرمیگا،فرانسیس او کونر، سائمن میک برنی،جینیفر کولن اوراسٹیو کولٹر نبھا رہے ہیں۔

20ملین ڈالر لاگت سے بننے والی ایور گرین میڈیا کی چونکا دینے والے واقعات سے بھرپور یہ فلم وارنر بروس پکچرزکے تحت رواں سال 10جون کو سینما گھروں کی زینت بنائی جائے گی۔