25 جون ، 2025 
پاکستان اور امریکا کے درمیان مذاکرات، آئندہ ہفتےتجارتی معاہدے کی تکمیل پر اتفاق ہوگیا
25 جون ، 2025
اسلام آباد: پاکستان اور امریکا کے درمیان تجارتی مذاکرات میں اگلے ہفتے معاہدےکی تکمیل اور اس کے بعد باہمی مفادات پر جامع شراکت داری تشکیل دینے پر اتفاق ہوا۔
وفاقی وزارت خزانہ کی جانب سے جاری اعلامیے کے مطابق وزیرخزانہ محمد اورنگزیب کی امریکی وزیرتجارت کےساتھ ورچوئل میٹنگ ہوئی۔ میٹنگ کے دوران فریقین نے جاری مذاکرات پر اطمینان کا اظہار کیا۔
اعلامیےکے مطابق فریقین نے تجارتی مذاکرات کو آئندہ ہفتے تک خوش اسلوبی سے مکمل کرنےکاعزم ظاہرکیا۔ تجارتی معاہدےکے بعد باہمی مفادات پر جامع شراکت داری تشکیل دیے جانے پر بھی اتفاق ہوا۔
اعلامیے میں کہا گیا ہےکہ شراکت داری اسٹریٹجک، سرمایہ کاری کے شعبوں اور باہمی دلچسپی کےتمام پہلوؤں کا احاطہ کرےگی۔ اس ضمن میں تکنیکی سطح کے مذاکرات آئندہ ہفتے مکمل کیے جانےکا امکان ہے۔
دونوں ممالک نے جلد از جلد تجارتی معاہدے کو حتمی شکل دینے پر اعتماد کا اظہار کیا۔
