پالی کیلے … سری لنکا نے دوسرے ون ڈے انٹرنیشنل میں تلکارتنے دلشان کے ناقابل شکست 119 رنز کی بدولت پاکستان کو جیت کیلئے 281 رنز کا ہدف دیا ہے۔ پالی کیلے میں کھیلے جارہے میچ میں سری لنکا نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 4 وکٹوں پر 280 رنز کا مجموعہ ترتیب دینے میں کامیاب ہوگیا۔ تلکارتنے دلشان اور کپتان مہیلا جے وردنے نے آج پاکستانی بولرز کا کوئی حربہ نہ چلنے دیا، سری لنکن آل راوٴنڈر نے 139 گیندوں پر 11چوکوں اور ایک چھکے کی مدد سے 119 رنز ناٹ آوٴٹ بنائے جبکہ جے وردنے 45 گیندوں پر 53 رنز کی اننگز کھیل کر سعید اجمل کی گیند پر بولڈ ہونے کے بعد پویلین لوٹے۔ اپل تھارنگا سہیل تنویر کی گیند پر وکٹ کیپر سرفراز احمد کے ہاتھوں کیچ آوٴٹ ہوئے جبکہ کمار سنگاکارا کو محمد حفیظ نے اپنی ہی گیند پر کیچ کرکے واپسی کا راستہ دکھایا دونوں نے 18، 18 رنز بنائے۔ چندی مل 32 رنز بنا کر شاہد آفریدی کی گیند پر ایل بی ڈبلیو ہوئے، تھیسارا پریرا 14 گیندوں پر 2 چھکون اور 2 چوکوں کی مدد سے 24 رنز بنا کر ناٹ آوٴٹ رہے۔پاکستان کی جانب سے محمد حفیظ، سہیل تنویر، شاہد آفریدی اور سعید اجمل نے ایک ایک وکٹ حاصل کی۔