کرکٹ لیجنڈ،پاکستانی کرکٹ ٹیم کے سابق کپتان ،مایہ ناز بلے باز جاوید میانداد نے زندگی کی 59 بہاریں دیکھ لیں،آج وہ اپنی 59ویں سالگرہ منا رہے ہیں۔

جاوید میانداد پاکستان کرکٹ کا ایسا باب ہیں، جن کے ذکر کےبغیر قومی کرکٹ کی تاریخ بالکل ادھوری ہوگی کیونکہ قومی کرکٹ کے چند یادگار ترین لمحات میں وہ مرکزی کردار رہے ہیں، چاہے وہ 1986کا شارجہ کا چھکا ہو یا عالمی کپ 1992کے سیمی فائنل اور فائنل کو بھلا کون بھول سکتا ہے،پاکستانی قوم کا بچہ بچہ جس نے ان مقابلوں کو براہ راست نہیں دیکھا لیکن وہ ان کے بارے میں اتنا دیکھ چکے ہیں، پڑھ چکے ہیںاور سن چکے ہیں کہ اسے من و عن یہ مقابلے یاد ہوں گے۔

شارجہ کا چھکا تو گویا ضرب المثل ہے جس نے میانداد کو شہرت کی بلندیوں پر پہنچا دیا اور ایک روزہ کرکٹ کو تاریخ کے یادگار ترین لمحات میں سے ایک عطا کیا۔ 1986ء میں آسٹریلیشیا کپ کے فائنل میں جب پاکستان کو آخری گیند پر چار رنز درکار تھے، میانداد نے چتن شرما کی فل ٹاس گیند پر چھکا رسید کر کے نہ صرف پاکستان کو پہلا ایک روزہ بین الاقوامی ٹورنامنٹ مقابلہ جتوایا بلکہ اس ایک چھکے سے ان پر دھن آسمان سے برسا اور اس کے بعد تو ان پر گویا انعامات کی بارش ہی ہوگئی۔

جاوید میاں داد نے اپنے کیرئیر کے 233 ایک روزہ میچوں میں7 ہزار 381 رنز بنائے۔8 سنچریاں اور 50 نصف سنچریاں بھی ان کے ریکارڈبک کا حصہ ہیں، ون ڈے کرکٹ میں آسٹریلیشیا کپ کے فائنل میں روایتی حریف بھارتی بولر چتن شرما کو چھکا مار کر وہ قومی ہیرو بنے۔جاوید میانداد 9 اکتوبر1976 کو نیوزی لینڈ کے خلاف ٹیسٹ کیپ حاصل کی، ان کے ٹیسٹ ریکارڈ میں 124 میچ اور8 ہزار 832 رنز شامل ہیں۔ جاوید میانداد نے 280 رنز کی ایک بڑی اننگز کے علاوہ 23 سنچریاں اور 43 نصف سنچریاں بھی اسکور کیں۔ جاوید میانداد کا اہم ترین اعزاز یہ ہے کہ انہوں نے کرکٹ کے 6 ورلڈ کپ مقابلوں میں شرکت کی ہے جو ابھی تک کسی کرکٹر کو حاصل نہیں ہو سکا ہے۔