پاکستان اور انگلینڈ کے درمیان برمنگھم میں کھیلے جانے والے تیسرے ٹیسٹ میچ کے آخری روز پاکستان کی ٹیم انگلینڈ کی جانب سے دیئے گئے، 343کے ہدف کے تعاقب میں شدید مشکلات کا شکار ہوگئی ہے اور پاکستان ٹیم اس وقت 148رنز پر اپنی 7 صف اول کی وکٹیں کھوچکی ہے۔

مجموعی طور پر گرین شرٹس نے 56اوورز کا سامنا کیا ہے،اور ابھی 28 اوورز کا کھیل باقی ہے۔اس طرح بظاہر شکست کے بادل اس پر منڈلاتے نظر آرہے ہیںجبکہ پاکستان کو میچ جیتنے کے لیے اب بھی 195رنز درکار ہیں اور اسکی صرف 3 وکٹیں باقی بچی ہیں۔

اس سے قبل صبح کے سیشن میں انگلش ٹیم نے اپنی دوسری اننگز 445رنز 6 کھلاڑی آئوٹ پر ڈیکلیئر کرکے پاکستان کو 343کا ہدف دیا تھا ، آج صرف ایک انگلش بیٹسمین بریسٹو 83رنز بناکر سہیل خان کی گیند پر آئوٹ ہوئے۔

اس کے بعد پاکستان نے اپنی دوسری اننگز شروع کی ،اور صرف 6 رنز پر پاکستان کی پہلی وکٹ محمد حفیظ 2پر پویلین لوٹ گئے۔جس کے بعد سمیع اسلم 70اور اظہر علی 38کے درمیان 73کی شاندار شراکت قائم ہوئی ۔

اس پارٹنر شپ کے بعد پاکستان کے صف اول کے بیٹسمینوں میں سے کوئی بھی انگلش بولروں کا ڈٹ کر مقابلہ نہ کرسکا اور یکے بعد دیگرے بیٹسمین پویلین لوٹتے رہے،یونس خان 4، کپتان مصباح الحق 10، اسد شفیق اور سرفراز احمد کوئی رن بنائے بغیر آئوٹ ہوئے۔

جس وقت چائے کا وقفہ ہوا تو کریز پر یاسر شاہ 7اور محمد عامر 15پر بیٹنگ کررہے ہیں،انگلینڈ کی جانب سے ووکس اور اسٹیون فن نے دو دو جبکہ جیمز اینڈریسن ، اسٹورٹ براڈ اور معین علی نے ایک ایک وکٹ اپنے نام کی۔