تیسرے اور آخری ٹیسٹ کے پہلے روز پاکستان نے اپنی پہلی اننگز میں2 وکٹوں کے نقصان پر 81رنز بنالئے، یونس خان 39اور سمیع اسلم 37رنز کے ساتھ کریز پر موجود ہیں۔

شارجہ کرکٹ اسٹیڈیم میں کھیلے جارہے میچ میں کپتان مصباح الحق نے ٹاس جیت کر بیٹنگ کا فیصلہ کیا، پاکستان ٹیم کی اننگز کا آغاز انتہائی مایوس کن انداز میں ہوا اور صرف ایک رن پراظہر علی اور اسد شفیق بغیر کھاتا کھولے پویلین لوٹ گئے۔

اس کے بعد سمیع اسلم اور یونس خان نے سنبھل کر بیٹنگ کرتے ہوئے اننگز کو آگے بڑھایا او کھانے کے وقفے تک مزید کوئی وکٹ گنوائےاسکور 81رنز تک پہنچادیا۔ویسٹ انڈیز کی طرف سے گیبریل نے 2وکٹیں حاصل کیں۔

شارجہ کرکٹ اسٹیڈیم میں کھیلے جارہے میچ میں پاکستان نے ٹیم میں2 تبدیلیاں کی ہیں، راحت علی اور سہیل خان کی جگہ محمد عامر اور وہاب ریاض کی واپسی ہوئی ہے۔

مصباح الحق کا بحیثیت کپتان یہ 49واں ٹیسٹ ہے جس کے بعد وہ سب سے زیادہ ٹیسٹ میچوں میں ٹیم کی قیادت کرنے والے پاکستانی کپتان بن گئے ہیں، اس سے قبل عمران خان نے 48میچوں میں ٹیم کی قیادت کی تھی۔ مصباح الحق کی کپتانی میں پاکستان 24ٹیسٹ جیت چکاہے۔

مصباح الحق سیریز میں وائٹ واش کیلئے پرعزم ہیں، ان کا کہنا ہے کہ ٹیسٹ میچ میں ہرگیند کو کھیلنا ہوتا ہے، ہرمیچ جیتنا خواہش ہوتی ہے۔

اگرپاکستان نے ویسٹ انڈیز کو تیسرے ٹیسٹ میں بھی شکست دے دی تو وہ دنیا کی پہلی ٹیم بن جائے گی جو ویسٹ انڈیز کو مسلسل 9انٹر نیشنل میچوں میں شکست دے کر نئی تاریخ رقم کرے گی ۔

حالیہ سیریز میں ماضی کی عالمی چیمپئن ویسٹ انڈیز کو تینوں فارمیٹ میں ناکامی کا منہ دیکھنا پڑا ہے۔پاکستان نے سرفراز احمد کی قیادت میں ٹی ٹوئنٹی سیریز تین۔ صفرجبکہ اظہر علی کی کپتانی میں ون ڈے سیریزبھی تین۔ صفر سے جیتی۔اب ٹیسٹ سیریز میں پاکستان کو دوصفر کی فیصلہ کن برتری حاصل ہے۔پاکستان نے ڈے اینڈ نائٹ ٹیسٹ56رنز سے جیتا جبکہ ابوظہبی ٹیسٹ میں133رنز سے کامیابی حاصل کی تھی۔

شارجہ اسٹیڈیم میں پاکستان نے اب تک آٹھ ٹیسٹ کھیلے ہیں، جن میں چار جیتے، تین ہارے اور ایک میچ ڈرا رہا۔اگر پاکستان نے یہ ٹیسٹ جیت لیا تو وہ 1997کے بعد پہلی بار ویسٹ انڈیز کے خلاف وائٹ واش کرے گا۔پاکستان ٹیم چھٹی بار کسی ٹیسٹ سیریز کے تمام میچ جیتے کر وائٹ واش کرے گی۔