03 اکتوبر ، 2017 
افغان سرحد سے دہشتگردوں کی فائرنگ، نائب صوبیدار شہید
03 اکتوبر ، 2017
راولپندی: افغان سرحد کے پار سے دہشت گردوں کی فائرنگ کے نتیجے میں ایک جوان شہید ہوگیا۔
انٹرسروسز پبلک ریلیشنز (آئی ایس پی آر) کے اعلامیے کے مطابق دہشت گردوں نے افغان سرحد کے پار سے فائرنگ راجگال میں مستل درہ پر کی۔
اعلامیے میں بتایا گیا کہ دہشت گردوں کی فائرنگ سے نائب صوبیدار اظہر علی شہید ہوا جس کی کی نماز جنازہ پشاور گیریژن میں ادا کی گئی۔
آئی ایس پی آر کے مطابق شہید جوان کا جسد خاکی ان کے آبائی علاقے میں لے جایا جائے گا اور پورے فوجی اعزاز کے ساتھ سپرد خاک کیا جائے گا۔
خیال رہے کہ کچھ روز قبل آرمی چیف جنرل قمر جاوید باجوہ نے افغانستان کا دورہ کیا تھا جہاں افغان صدر اشرف غنی سے ان کی ملاقات بھی ہوئی تھی۔
دونوں رہنماؤں کے درمیان علاقائی سلامتی اور باہمی تعلقات پر تبادلہ خیال ہوا تھا۔
افغان میڈیا کے مطابق پاکستان اور افغانستان کے درمیان علاقائی سلامتی ،باہمی تعلقات پر تبادلہ خیال ہواجبکہ دہشت گردی کے خلاف جنگ اور تجارت جیسے امور بھی زیر غور آئے۔
