کراچی… …قائد آباد میں رینجرز کی موبائل پر بم حملے کا مقدمہ نامعلوم افراد کے خلاف درج کر لیا گیا۔ پولیس کے مطابق مقدمہ نمبر 354/2012 دہشت گردی ایکٹ اور دیگر دفعات کے تحت حوالدار کی مدعیت میں درج کیا گیا۔ واضح رہے کہ قائد آباد انڈسٹریل ایریا میں داود چورنگی کے قریب فیکٹری کی دیوار کے ساتھ کھڑی رینجرز موبائل کے قریب اتوار اور پیر کی درمیانی شب زوردار دھماکا ہوا جس سے رینجرز کے سپاہی قاسم، نواز، ڈرائیور صدیق اور لانس نائیک ثناء اللہ اور فیکٹری کا چوکیدار فیض محمد زخمی ہوگئے تھے جنھیں اسپتال منتقل کیا گیا جہاں رینجرزاہلکاروں قاسم اور صدیق کی حالت نازک بتائی جاتی ہے۔ دھماکے سے رینجرز موبائل کو شدید نقصان پہنچا، فیکٹری کی دیوار ٹوٹ گئی اور زمین میں گڑھا پڑ گیا جبکہ اطراف کی عمارتوں کے شیشے بھی ٹوٹ گئے۔اطلاع ملنے پر پولیس، رینجرز، بم ڈسپوزل اسکواڈ اور دیگر حساس اداروں کے حکام موقع پر پہنچے اور تفتیش شروع کی۔ بم ڈسپوزل اسکواڈ کی رپورٹ کے مطابق دھماکا یونی ڈائرکشن امپرووائزڈ ڈیوائس سے کیا گیا جس کو ٹائمر ڈیوائس کے ساتھ نصب کیا گیا تھا، دھماکے میں ایک کلو گرام سے زائد دھماکا خیز مواداوربیرنگ بال استعمال کیے گئے۔تحقیقاتی حکام کے مطابق یہ دھماکا گزشتہ سال دسمبر میں صفورہ چورنگی اور یونیورسٹی روڈ پر کیے جانے والے دھماکوں سے مماثلت رکھتا ہے جن میں یونی ڈائرکشن آئی ای ڈی استعمال کی گئی تھی اور ان دھماکوں میں بھی رینجرز کو ہی نشانہ بنایا گیا تھا۔