پی ایس پی اتحاد سے ناراض ایم کیو ایم اراکین اسمبلی کا پیپلز پارٹی میں شمولیت کا امکان

متحدہ قومی موومنٹ (ایم کیو ایم) پاکستان سے وابستہ اراکین قومی اسمبلی کا پیپلز پارٹی میں شمولیت کا امکان ہے، اسی سلسلے میں پیپلز پارٹی کی قیادت سے ملاقاتیں بھی جاری ہیں۔

ذرائع کے مطابق ایم کیو ایم کے سات اراکین نے پیپلز پارٹی میں شمولیت کا فیصلہ کرلیا ہے، پیپلز پارٹی کی جانب سے دو روز میں اہم پریس کانفرنس متوقع ہے۔

اسلام آباد میں ایم کیو ایم اراکین کی پیپلز پارٹی کی اعلیٰ قیادت سابق صدر آصف زرداری اور ایم این اے فریال تالپور سے جاری ہیں۔

پی ایس پی سے اتحاد پر ایم کیوایم رہنماؤں کے مؤقف میں تضاد

ناراض ارکان کو منانے کے لیے رابطہ کمیٹی کا اہم اجلاس، ایم کیوایم ہر صورت قائم و دائم رہے گی، امین الحق

ملاقات کرنے والوں میں سلمان مجاہد بلوچ، ڈاکٹر فوزیہ علی، خوش بخت شجاعت اور دیگر شامل ہیں۔

دوسری جانب ایم کیوایم پاکستان میں انتشار کے باعث ارکان کو توڑنے کے لیے آصف زرداری نے ڈاکٹر عاصم کو ٹاسک دے دیا۔

ایم کیوایم پاکستان اور پی ایس پی کے درمیان سیاسی اتحاد کے بعد کراچی کی سیاست ایک نیا رخ اختیار کرچکی ہے۔

اتحاد سے ایم کیوایم پاکستان کے کئی ارکان ناراض ہوگئے ہیں جن میں عامر خان، کشور زہرہ، شبیر قائم خانی، شاہد پاشا اور دیگر شامل ہیں۔

عامر خان پی ایس پی سے مفاہمت پر ناخوش

ساتھیوں کو یہ مینڈیٹ نہیں دیا تھا، پی ایس پی کے ساتھ مذاکرات کے لیے جو طے ہوا تھا وہ اس سے مختلف تھا، ڈپٹی کنوینر ایم کیو ایم پاکستان

ایم کیوایم میں انتشار کا سیاسی فائدہ اٹھانے کے لیے آصف زرداری نے پیپلزپارٹی کراچی ڈویژن کے صدر ڈاکٹر عاصم کو ٹاسک دیا ہےکہ وہ ایم کیوایم کے ارکان سے رابطے کریں جس پر ڈاکٹر عاصم بھی متحرک ہوگئے ہیں۔

ذرائع کا کہنا ہےکہ ڈاکٹر عاصم ایم کیوایم کے تین ممبران قومی اسمبلی اور ایک سینیٹر کی آصف زرداری سے ملاقات کراچکے ہیں اور وہ ایم کیوایم کےمزید کئی ارکان قومی و صوبائی اسمبلی سے رابطے میں ہیں۔

ایم کیوایم پاکستان اور پاک سرزمین پارٹی کو کس نے ملایا؟

وہ قوتیں جو دونوں پارٹیوں میں اختلافات دور کرنے کے لیے کچھ عرصے سے ثالثی کا کردار ادا کررہی تھیں انہوں نے ایک دن قبل واضح پیغام دیا

واضح رہے کہ گزشتہ روز آصف زرداری سے ایم کیوایم کے منحرف رکن سلمان مجاہد اور ڈاکٹر فوزیہ نے ملاقات کی تھی جس کے بعد ان کی پی پی میں شمولیت کا امکان ظاہر کیا جارہا ہے۔