بھارت مقبوضہ کشمیر میں کیمیائی ہتھیار استعمال کررہا ہے: ترجمان دفتر خارجہ

اسلام آباد: ترجمان دفتر خارجہ ڈاکٹر فیصل نے کہا ہےکہ بھارت مقبوضہ کشمیر میں نہتے شہریوں پر کیمیائی ہتھیار استعمال کررہا ہے۔

دفتر خارجہ میں ہفتہ وار بریفنگ کے دوران ترجمان ڈاکٹر فیصل نے مقبوضہ کشمیر میں بھارتی فوج کے مظالم کی مذمت کرتے ہوئےکہا کہ مقبوضہ کشمیر میں بھارتی قابض افواج نے 18 کشمیریوں کو شہید کردیا، بھارت مقبوضہ کشمیر میں نہتے شہریوں پر کیمیائی ہتھیاراستعمال کررہا ہے، قابض افواج نے بانڈی پورہ میں کیمیائی ہتھیاروں کا استعمال کیا، بھارت مقبوضہ کشمیر میں انسانی حقوق کی سنگین خلاف ورزیاں کررہا ہے۔

کلبھوشن کیس کو عالمی عدالت میں بھرپور طریقے سے لڑیں گے: ترجمان

کلبھوشن کیس پر بات کرتے ہوئے ان کا کہنا تھا کہ بھارتی جاسوس کلبھوشن کے کیس کی فروری سے سماعت شروع ہو رہی ہے اور عالمی عدالت انصاف میں یہ سماعت مسلسل چلے گی، کیس کی مکمل تیاری ہے اور اسے عالمی عدالت میں بھرپور طریقے سے لڑیں گے۔

پاک بھارت مذاکرات پر بات کرتے ہوئے ترجمان دفتر خارجہ نے کہا کہ پاکستان پرُامن ہمسائیگی کے قائداعظم کے نظریے پر یقین رکھتا ہے، بھارت سے مذاکرات نہ ہوئے تو کرتارپور سمیت کسی معاملے پر بات نہیں بڑھ سکتی، مذاکرات کیلئے بھارت کو منا نہیں رہے بلکہ پہلا خط ان کی طرف سے آیا تھا۔

پاکستان ابھی بھی پُرامن ہمسائیگی کا خواہش مند ہے: ڈاکٹر فیصل

انہوں نے پاکستانی اور بھارتی وزیر خارجہ کی خفیہ ملاقات کی تردید کرتے ہوئے کہا کہ پاکستان ابھی بھی پُرامن ہمسائیگی کا خواہش مند ہے، بھارتی وزیرخارجہ سےطے شدہ ملاقات کی منسوخی پر افسوس ہے، سشماء سوراج ملاقات پر راضی ہوئی تھیں۔

ڈاکٹر فیصل نے وزیر خارجہ شاہ محمود قریشی کے دورہ امریکا سے آگاہ کرتے ہوئے بتایا کہ وزیر خارجہ نے امریکا میں مختلف ممالک کے سفراء سے ملاقاتیں کیں، وزیر خارجہ شاہ محمود عالمی بینک کےسربراہ سے بھی ملے، انہوں نے سندھ طاس معاہدے اور متنازع کشن گنگا ڈیم پر تبادلہ خیال کیا۔

ہم نے اپنے اصولی مؤقف سے امریکا کو بھی آگاہ کردیا: ترجمان دفتر خارجہ

ترجمان دفتر خارجہ نے بتایا کہ وزیر خارجہ نے امریکی مشیر قومی سلامتی سے جنوبی ایشیاء میں سلامتی کی صورتحال پربات کی جب کہ شاہ محمود نے امریکی ہم منصب مائیک پومپیو سے بھی ملاقات کی جس میں پومپیو نے افغانستان میں قیام امن کیلئے پاکستان کے کردار کو سراہا، امریکی صدر ٹرمپ کے ساتھ وزیر خارجہ کی مثبت بات چیت ہوئی، ہم نے اپنے اصولی مؤقف سے امریکا کو بھی آگاہ کیا ہے۔

ترجمان کے مطابق وزیر خارجہ نےکہا ہے کہ پاکستان قومی مفاد پر سمجھوتہ نہیں کرے گا، وزیر خارجہ نےکہا کہ کشمیریوں کی خواہشات کے مطابق مسئلہ کشمیرحل کیا جانا چاہیے۔

ایک سوال کے جواب میں ڈاکٹر فیصل کا کہنا تھا کہ طالبان سے امریکا براہ راست مذاکرات کرے اور خواہش ہوگی کہ اس میں کامیابی ملے، ہم کسی ایک ملک کو افغانستان میں قیام امن پر ذمہ دار نہیں ٹھہرانا چاہیں گے، اس معاملے پر تمام ممالک کو اپنا حصہ ڈالنا ہو گا۔

 شکیل آفریدی کے معاملے پر پاکستان کے مؤقف میں تبدیلی نہیں آئی: ڈاکٹرفیصل

شکیل آفریدی نے سے متعلق سوال پر انہوں نے کہا کہ شکیل آفریدی کے معاملے پر پاکستان کے مؤقف میں کوئی تبدیلی نہیں آئی۔

سی پیک سے متعلق سوال کے جواب میں ترجمان دفتر خارجہ کا کہنا تھا کہ سی پیک کے معاملے پر چین کے ساتھ رابطے میں ہیں اور دونوں ممالک ایک پیج پر ہیں، سی پیک میں سعودی عرب کی شمولیت پر منصوبہ بندی کمیشن جواب دے سکتا ہے۔