کولمبو… سری لنکن پریمیئر لیگ میں آج دو میچز کھیلے جائیں گے۔ اس سلسلے میں آج پہلا میچ بس نہیراکرکٹ دوندی اور روہونہ رائلز کی ٹیموں کے درمیان آر پریما داسا کرکٹ سٹیڈیم کولمبو میں کھیلا جائیگا اور دوسرے میچ میں کندو تراوارئیرز اور اووانیکسٹ کی ٹیمیں اسی مقام پر آمنے سامنے ہونگی۔ ایونٹ میں 7 ٹیمیں شرکت کر رہی ہیں جن میں بس نہیراکرکٹ دوندی، کندو تراوارئیرز، نیگن آہیرا نیگس‘ روہونہ رائلز ‘ اٹھورا روڈ راس‘ اووانیکسٹ اور ویامبا یونائیٹڈ کی ٹیمیں شامل ہیں جن میں سے چار ٹاپ ٹیمیں 28 اور 29 اگست کو شیڈول سیمی فائنل کے لئے کوالیفائی کر لیں گی، فاتح کا فیصلہ 31 اگست کو ہوگا، آسٹریلیا سے سیریز کی وجہ سے پاکستانی کھلاڑی فائنلز کے لئے دستیاب نہیں ہوں گے۔ ایونٹ میں پاکستان کی جانب سے شاہد آفریدی ‘ مصباح الحق ‘ سعید اجمل ‘ سہیل تنویر ‘ عمر اکمل ‘ اظہر محمود‘ عمران فرحت ‘ شعیب ملک‘ فواد عالم ‘ حماد اعظم ‘ عبدالرحمن ‘ عمر گل ‘ وہاب ریاض ‘ احمد شہزاد اور عمران نذیر مختلف ٹیموں کی نمائندگی کررہے ہیں ۔گذشتہ روز ہونے والے میچ میں کندوراتا وارئرز نے ویامبا یونائٹیڈ کو دلچسپ مقابلے کے بعد دو رنز سے ہرا دیاتھا۔