07 مارچ ، 2020 
ویسٹ انڈیز کے کیرون پولارڈ پی ایس ایل نہیں کھیل سکیں گے
07 مارچ ، 2020
ویسٹ انڈیز کے آل راؤنڈر کارلوس بریتھ ویٹ پی ایس ایل 2020 کے مکمل ایڈیشن کے لیے پشاور زلمی کا حصہ بن گئے ہیں۔
کارلوس بریتھ ویٹ کوابتدائی طور پر ہم وطن کیرون پولارڈ کی جگہ 6 مارچ تک پشاور زلمی کے اسکواڈ میں شامل کیا گیا تھا۔
کیرون پولارڈ کو ویسٹ انڈیزکے دورہ سری لنکا کے بعد پشاور زلمی کے اسکواڈ کو جوائن کرنا تھا تاہم وہ فٹنس مسائل کے باعث رواں سال لیگ میں شرکت نہیں کریں گے۔
ویسٹ انڈین آل راؤنڈرنے دائیں ٹانگ میں کھچاؤکی شکایت کے باعث لیگ کے پانچویں ایڈیشن میں عدم دستیابی ظاہر کی ہے۔
کیرون پولارڈ نے کہاکہ وہ بوجھل دل کے ساتھ ایونٹ کے آئندہ میچوں کے لیے پشاور زلمی کے ا سکواڈ میں شامل کھلاڑیوں کے لیے نیک تمناؤں کا اظہار کرتے ہیں۔
انہوں نے کہا کہ وہ رواں سال لیگ میں شرکت نہ کرنے پر معذرت خواہ ہیں تاہم انہیں امید ہے کہ بہترین کھلاڑیوں پر مشتمل اسکواڈ ڈیرن سیمی کو بطور کوچ پہلی ٹرافی تھمانے میں کامیاب ہوگا۔
