کراچی میں آج بھی آندھی چلنے کا امکان

کراچی میں آج بھی گزشتہ روز کی طرح آندھی چلنے کا امکان ہے۔

محکمہ موسمیات کے مطابق مغربی ہواؤں کا سسٹم کراچی کے شمال مغرب میں لسبیلہ اور اوتھل کے قریب موجود ہے جب کہ سسٹم کا رخ مشرق کی جانب ہے جس سے کراچی میں آج بھی آندھی چل سکتی ہے۔

کراچی میں آندھی، مختلف واقعات میں 4 افراد جاں بحق اور 18 زخمی ہوگئے

آندھی 54سے 74کلومیٹر فی گھنٹہ کی رفتار سے چلی، حد نگاہ ایک کلومیٹر رہ گیا، نارتھ کراچی میں گھروں کےشیشے ٹوٹ گئے، بھینسوں کے باڑوں میں آگ لگنے سے متعدد جانور ہلاک

محکمہ موسمیات کے ڈائریکٹر سردار سرفراز  کا کہنا ہے کہ آندھی سے شہر کے شمالی اور شمال مشرقی حصے متاثر ہو سکتے ہیں۔

انھوں نے بتایا کہ  آندھی کے دوران 45 سے 54 کلو میٹر کی رفتار سے ہوائیں چل سکتی ہیں جب کہ شہر  کی گرمی اور زائد نمی کا تناسب سسٹم کی شدت بڑھا سکتا ہے۔

واضح رہے کہ گزشتہ روز بھی کراچی کو شدید آندھی نے اپنی لپیٹ میں لیا تھا جس کے بعد  مختلف حادثات میں خاتون سمیت 4 افراد جاں بحق اور 18 کے قریب افراد زخمی ہوئے تھے۔