وزیراعظم سے وزیراعلیٰ پنجاب کی ملاقات، جنوبی پنجاب سیکرٹریٹ کے قیام پر بریفنگ

اسلام آباد: وزیراعظم عمران خان سے وزیراعلیٰ پنجاب عثمان بزدار نے ملاقات کی ہے جس میں جنوبی پنجاب میں ایڈیشنل چیف سیکرٹری اور ایڈیشنل انسپکٹر جنرل (آئی جی) پولیس کی تعیناتی مشاورت کی گئی۔

وزیراعظم سے ہونے والی ملاقات میں وزیراعلیٰ پنجاب نے جنوبی پنجاب کے اضلاع کیلئے مختص کیے گئے بجٹ اور جنوبی پنجاب میں سیکرٹریٹ کے قیام پر وزیراعظم کو بریفنگ دی۔

جنوبی پنجاب سیکرٹریٹ کیلئے ایڈیشنل چیف سیکرٹری کی پوسٹ کی منظوری دیدی گئی

وزیراعلیٰ پنجاب نے سیکرٹریٹ کے لیے الگ ایڈیشنل آئی جی پولیس کی بھی پوسٹ کی منظوری دے دی

ذرائع نے بتایا کہ ملاقات میں جنوبی پنجاب میں جلد ایڈیشنل چیف سیکرٹری اور ایڈیشنل آئی جی تعینات کرنے پر بھی مشاورت کی گئی۔ 

ذرائع کے مطابق وزیراعلیٰ پنجاب نے وزیراعظم سے آئندہ بجٹ میں جنوبی پنجاب کیلئے خصوصی پیکج کی بھی درخواست کی۔ 

خیال رہے کہ گزشتہ دنوں وزیراعلیٰ پنجاب عثمان بزدار نے جنوبی پنجاب سیکرٹریٹ کیلئے الگ ایڈیشنل چیف سیکرٹری اور ایڈیشنل آئی جی کی پوسٹ کی منظوری دی ہے۔

انہوں نے کہا کہ  یکم جولائی سے یہ افسران اپنے فرائض انجام دینا شروع کردیں گے۔