03 ستمبر ، 2020 
کورنگی میں گزشتہ روز ٹارگٹ کلنگ کی سی سی ٹی وی فوٹیج سامنے آگئی
03 ستمبر ، 2020
کراچی کے علاقے کورنگی میں گزشتہ روز مبینہ ٹارگٹ کلنگ کی سی سی ٹی وی فوٹیج منظر عام پر آگئی ہے، ویڈیو میں فائرنگ کرنے والے ملزم کاچہرہ نہایت واضح ہے۔
کورنگی نمبر 6 میں گزشتہ روز فائرنگ کرکے 30 سالہ شخص کو قتل کردیا گیا تھا، مقتول منیف علی دکاندار تھا جس کی ایک ماہ قبل ہی شادی ہوئی تھی۔
ویڈیو میں دیکھاجاسکتاہےکہ مقتول موٹرسائیکل پر تھا اور ایک جگہ رک کرموبائل فون پرکسی سے بات کررہا تھاکہ دوسری جانب سے موٹرسائیکل پر 2 ملزمان آئے، موٹر سائیکل چلانے والے ملزم نے چہرہ چھپایا ہواہے جب کہ دوسرے کا چہرہ قابل شناخت ہے۔
ملزم نے اترتے ہی منیف کے ہاتھ سے موبائل لیااور فائرنگ کردی جس کے بعد دونوں ملزمان باآسانی فرار ہوگئے۔
سینیئرسپرنٹنڈٹ آف پولیس (ایس ایس پی) کورنگی فیصل عبداللہ چاچڑ نے جیو نیوزکو بتایاکہ واردات میں 30بور پستول استعمال ہواہے جو اس سے پہلے استعمال نہیں ہوا، قتل کی نوعیت کے حوالے سے تحقیقات جاری ہیں۔
