09 نومبر ، 2020
اس بات سے تو سب ہی واقف ہیں کہ ایپل کے ائیر پوڈز کی قیمت عام آدمی کی پہنچ سے دور ہے اور اگر کوئی شخص ان ائیرپوڈز کو خرید بھی لیتا ہے تو اس کے دل میں بس ایک ہی خوف منڈلا رہا ہوتا ہے کہ کہیں یہ گُم نہ ہو جائیں۔
اکثر ہم باہر نکلتے وقت یا بس اور ٹرین وغیرہ میں ان ائیرپوڈز کا استعمال کر رہے ہوتے ہیں اور اگر یہ کبھی آپ کے کان سے نکل کر گر جائے تو اسے ڈھونڈنا کافی مشکل ہو جاتا ہے۔
جاپان میں لوگوں کے ائیر پوڈز گمنا اب ایک مسئلہ بن چکا ہے، کلٹ آف میک کی ایک رپورٹ کے مطابق رواں سال جولائی سے ستمبر کے دوران ٹوکیو میں تقریباً 78 اسٹیشنز سے ائیرپوڈز گم ہوجانے کے 850 کے قریب کیسز رپورٹ ہوئے۔
اس مسئلے سے نمٹنے کے لیے ایسٹ جاپان ریلوے اور جے آر ایسٹ نے ٹیکنالوجی کمپنی پیناسونک کے ساتھ ہاتھ ملایا ہے اور ایک ویکیوم کی طرح ڈیوائس تیار کی جو ائیرپوڈز ڈھونڈنے کے لیے استعمال کی جائے گی۔
یہ ڈیوائس ابھی آزمائشی مراحل میں ہے جسے ایک اسٹیشن پر ٹیسٹ بھی کیا جا رہا ہے۔
اسٹیشنز کے حکام کا کہنا ہے کہ وہ عام طور پر ٹرین سے ائیرپوڈز اٹھانے کے لیے گریبر ٹول کا استعمال کرتے ہیں اور اس گریبر ٹول سے ایپل کی ائیرپوڈز پکڑنا بہت مشکل ہوتا ہے۔