16 دسمبر ، 2020 
'سینیٹ الیکشن وقت سے پہلے کرائیں گے، شو آف ہینڈ کیلئے سپریم کورٹ جارہے ہیں'
16 دسمبر ، 2020
وزیراعظم عمران خان کا نے ایک بار پھر کہا ہے کہ انہیں اپوزیشن سے کوئی خطرہ نہیں ہے۔
پشاور میں صحافیوں سے گفتگو کرتے ہوئے وزیراعظم عمران خان کا کہنا تھا کہ سینیٹ الیکشن وقت سے پہلے کرائیں گے، شو آف ہینڈ کے ذریعے الیکشن کے لیے سپریم کورٹ سے رجوع کر رہے ہیں، اٹارنی جنرل نے معاملے پر تفصیلی بریفنگ دی ہے۔
انہوں نے مزید کہا کہ حکومت کے لیے سینیٹ انتخابات میں ہارس ٹریڈنگ آسان ہوتی ہے، ہم نے 20 ایم پی ایز کو پارٹی سے نکالا کیونکہ ہم شفاف انتخابات پر یقین رکھتے ہیں۔
اپوزیشن کے ساتھ ڈائیلاگ کے حوالے سے بات کرتے ہوئے عمران خان کا کہنا تھا ڈائیلاگ کی بات کی تو اپوزیشن نے 34 صفحات کا این آر او مانگ لیا، لیکن این آر او کسی صورت نہیں دوں گا۔
وزیراعظم نے کہا کہ اپوزیشن کے خلاف کیس ہماری حکومت میں نہیں بنے، اپوزیشن جن کیسز کا سامنا کر رہی ہے وہ ماضی میں قائم ہوئے۔
ان کا کہنا تھا کہ ہماری حکومت کو اپوزیشن سے کوئی خطرہ نہیں ہے، لاہور جلسے کے دن میں کیا کر رہا تھا سب نے دیکھ لیا، مجھ پر کسی قسم کا کوئی دباؤ نہیں ہے۔
عمران خان کا کہنا تھا کہ اپوزیشن بڑے جلسے کرتی پھر رہی ہے، چاہوں تو اب بھی اپوزیشن سے بڑا جلسہ کر سکتا ہوں۔
