امریکی انخلا کے دوران اسلام آباد ائیرپورٹ پر 450 پروازیں آپریٹ ہوئیں ، سی اے اے

افغانستان سے امریکی اور اتحادی افواج کے انخلا کی مہم کے دوران پاکستانی دارالحکومت اسلام آباد کا ائیرپورٹ انتہائی مصروف رہا ۔

سول ایوی ایشن اتھارٹی ( سی اے اے ) کی رپورٹ کے مطابق  16 اگست سے 31  اگست کے دوران انخلا مہم کے دوران  اسلام آباد ائیرپورٹ پر 450 پروازیں آپریٹ ہوئیں۔ 

سی اے اے کے مطابق  انخلا مہم کی 450 پروازیں شیڈول پروازوں کے علاوہ ہیں۔ 

افغانستان سے انخلا میں کتنے ملکوں کی ائیر فورس اور فضائی کمپنیوں نے کردار ادا کیا؟

پاکستان انٹرنیشنل ائیر لائن سمیت 27 سے زائد کمرشل فضائی کمپنیوں نے بھی اس مشن میں بھرپور کردار ادا کیا۔

رپورٹ میں بتایا گیا ہے کہ انخلا مہم کی 450 پروازیں کابل کے علاوہ دنیا کے مختلف شہروں سے اسلام آباد پہنچیں جبکہ  انخلا مہم کے دوران افغانستان سے 25 ہزار سے زیادہ افراد اسلام آباد لائے گئے  جن میں اکثریت  ٹرانزٹ مسافروں کی تھی۔ 

سی اے اے  کی رپورٹ  کے مطابق  افغانستان سے آئے 3  ہزار سے زائد  افراد کو ائیرپورٹ سے باہر آنے کی اجازت دی گئی جبکہ  افغانستان سے نکالے گئے افراد کو مختلف ممالک میں پہنچایا گیا۔

 رپورٹ میں کہا  گیا ہے کہ انخلا مہم کے دوران امریکا، جرمنی، ترکی، مصر ،ہالینڈ اور بیلجیم سمیت ایک درجن سے زیادہ ممالک کی ائیرفورس کے طیاروں نے اسلام آباد میں لینڈ کیا۔

رپورٹ میں کہا گیا ہے کہ ائیر ٹریفک کے انتہائی دباؤ کے باوجود پاکستان سول ایوی ایشن اتھارٹی نے نہایت عمدگی سے پروازوں کی رہنمائی کی۔

سی اے اے کی رپورٹ کے مطابق مختصر مدت میں سیکڑوں  پروازوں کی آمدورفت کے دوران اسلام آباد ائیرپورٹ پرکوئی نا خوش گوار واقعہ پیش نہیں آیا۔

 رپورٹ میں مزید کہا گیا ہے کہ کابل سے اسلام آباد لائے گئے افراد میں فوجیوں ،سفارت کاروں اور مغربی باشندوں کے علاوہ امریکا اور نیٹو کیلئے کام  کرنے والے افغان باشندے شامل تھے۔

اس کے علاوہ   اسلام آباد ائیرپورٹ پر سی اے اے نے آپریٹرز اور مسافروں کو عمدگی سے خدمات فراہم کیں۔