21 فروری ، 2022 
سندھ میں دو گھنٹے کے دوران تین مقامات پر ریلوے حادثات
21 فروری ، 2022
سندھ میں تین مختلف مقامات پر بیک وقت تین ریلوے حادثات کے نتیجے میں ٹرینوں کی آمدورفت معطل ہوگئی تاہم اس کے نتیجے میں کسی جانی نقصان کی اطلاع نہیں ملی۔
ریلوے حکام کے مطابق ہنگامی بنیادوں پر کام شروع کر دیا گیا ہے، ریلوے عملے کی حاضر دماغی سے کراچی ایکسپریس بڑے حادثے سے بچ گئی۔
حیدرآباد اور ٹنڈو آدم کے درمیان ریلوے اسٹیشن ڈیتھا میں ریلوے لائن ٹوٹی ہوئی تھی۔
گینگ مین کی جانب سے ریلوے لائن ٹوٹنے کی اطلاع پر ٹرینوں کی آمد و رفت عارضی طور پر معطل ہوئی جبکہ سکھر میں روہڑی ریلوے اسٹیشن پر ایک انجن پٹری سے اتر گیا۔
اس کے علاوہ ٹنڈو مستی خان ریلوے اسٹیشن پر مال گاڑی کی ایک بوگی پٹری سے اتر گئی۔ مال گاڑی کی بوگی اترنے کے نتیجے میں کراچی سے اندرون ملک جانے والا ٹریک متاثر ہوا ہے۔ دونوں واقعات میں کوئی جانی نقصان نہیں ہوا، ریلوے ٹریفک کچھ دیر کے لیے معطل ہوگئی۔
پٹری سے اترنے والی بوگی کی مال گاڑی کراچی آ رہی تھی۔ ریلوے ذرائع کے مطابق روہڑی اور ٹنڈو مستی خان حادثات کے مقامات پر امدادی ٹیمیں موقع پر پہنچ گئی ہیں اور مختلف مقامات پر رکی ہوئی ٹرینوں کو رواں رکھنے کی کوشش کی جا رہی ہے۔
