02 اپریل ، 2022 
تحریک عدم اعتماد کو مزید ٹالا نہیں جا سکتا: اٹارنی جنرل کا وزیراعظم کو مشورہ
02 اپریل ، 2022
اٹارنی جنرل بیرسٹر خالد جاوید خان نے وزیراعظم کو آگاہ کیا ہے کہ اپوزیشن کی جانب سے پیش کی گئی تحریک عدم اعتماد کو مزید ٹالا نہیں جا سکتا۔
ذرائع کا کہنا ہے کہ وزیراعظم عمران خان سے اٹارنی جنرل بیرسٹر خالد جاوید خان کی ملاقات ہوئی جس میں تحریک عدم اعتماد سے متعلق قانونی مشاورت کی گئی۔
ذرائع کے مطابق اٹارنی جنرل نے وزیراعظم کو کوئی بھی غیر آئینی اور غیر قانونی اقدام نہ کرنےکا مشورہ دیا۔
ذرائع کا بتانا ہے کہ اٹارنی جنرل نے وزیراعظم کو آگاہ کیا کہ تحریک عدم اعتماد کو مزید نہیں ٹالا جا سکتا۔
ذرائع کا کہنا ہے کہ اٹارنی جنرل نے بتایا سپریم کورٹ کے احکامات کی روشنی میں کسی کو ووٹ ڈالنے سے نہیں روک سکتے۔
خیال رہے کہ اس سے قبل قانونی ٹیم وزیراعظم عمران خان کو یہ باور کروا چکی ہے کہ تحریک عدم اعتماد کی کامیابی کی صورت میں وہ وزارت عظمیٰ کے عہدے پر برقرار نہیں رہ سکتے۔
وزیراعظم عمران خان کے خلاف تحریک عدم اعتماد پر ووٹنگ بروز اتوار 3 اپریل کو متوقع ہے۔
