11 نومبر ، 2012 
کراچی: نارتھ ناظم آباد اور گلشن اقبال میں فائرنگ، 2 افراد جاں بحق، 5 زخمی
11 نومبر ، 2012
کراچی … کراچی کے علاقے نارتھ ناظم آباد میں سیفی کالج کے قریب فائرنگ سے 2 افراد جاں بحق جبکہ گلشن اقبال بلاک 2 میں مدرسے کے قریب فائرنگ سے 5 افراد زخمی ہوگئے۔ نمائندہ جیو نیوز ظل حیدر کے مطابق نارتھ ناظم آباد میں سیفی کالج کے قریب نامعلوم موٹر سائیکل سواروں نے ایک گاڑی کو روک کر اس پر فائرنگ کردی جس کے نتیجے میں 2 افراد جاں بحق ہوگئے۔ ذرائع کے مطابق دونوں مقتولین نیو کراچی کے رہائشی تھے، دونوں افراد کی لاشیں عباسی شہید اسپتال منتقل کردی گئی ہیں۔ دوسری جانب گلشن اقبال بلاک 2 میں مدرسے کے قریب ہوٹل پر نامعلوم افراد نے فائرنگ کردی جس کے نتیجے میں 5 افراد زخمی ہوگئے جنہیں فوری طور پر اسپتال منتقل کردیا گیا۔ اسپتال ذرائع کے مطابق زخمیوں میں 2 افراد کی حالت تشویشناک ہے۔
