26 اگست ، 2022 
وزارت داخلہ نے ملک بھر میں سیلاب سے متاثرہ علاقوں میں فوج تعیناتی کی منظوری دے دی
26 اگست ، 2022
وزارت داخلہ نے سیلاب کی ہنگامی صورتحال پر متاثرہ علاقوں میں پاک فوج کی تعیناتی کی منظوری دے دی۔
وزارت داخلہ کے مطابق سول حکومت کی مدد کیلئے چاروں صوبوں میں پاک فوج تعینات کرنے کی منظوری دی گئی ہے اور آرٹیکل 245 کے تحت فوج تعیناتی کی سمری وفاقی کابینہ کوحتمی منظوری کیلئے بھجوادی ہے۔
وزارت داخلہ کا کہنا ہے کہ چاروں صوبائی حکومتوں نےسیلاب متاثرہ علاقوں میں فوج تعینات کرنےکی ریکوزیشن بھجوائی، ریلیف اینڈ ریسکیو آپریشنزمیں مدد کیلئے پاک افواج کی تعیناتی کی جارہی ہے، پاک افواج کو چاروں صوبوں کے سیلاب سے آفت زدہ علاقوں میں تعینات کیا جارہا ہے۔
وزیرداخلہ رانا ثنا اللہ کے مطابق حکومت پنجاب نےڈی جی خان میں سیلاب متاثرہ علاقوں اور خیبرپختونخوا حکومت نے ڈی آئی خان میں فوج تعیناتی کی ریکوزیشن کی ہے جبکہ حکومت بلوچستان نے نصیرآباد، جھل مگسی، صحبت پور، جعفرآباد اورلسبیلہ میں فوج کی تعیناتی کیلئے ریکوزیشن کی ہے۔
وزیر داخلہ کا کہنا تھاکہ سندھ حکومت نے سیلابی علاقوں کیلئے فوج تعینات کرنے کی ریکوزیشن بھیجی ہے۔
رانا ثنا اللہ کا کہنا تھاکہ کنٹرول روم سے سیلاب کی صورتحال کو مسلسل مانیٹر کیا جارہاہے، سیلاب سے متاثرہ لوگوں کو کسی صورت اکیلا نہیں چھوڑیں گے۔
خیال رہے کہ ملک بھر میں مون سون بارشوں کے بعد سیلابی ریلوں نے تباہی مچا دی ہے اور ملک کے چاروں صوبے اس وقت بدترین سیلابی ریلوں کی زد میں ہیں۔
ملک میں سیلابی ریلوں اور دیگر واقعات میں 900 سے زائد افراد جاں بحق ہوچکے ہیں۔
مزید خبریں :
پاکستان کی نامور مصنفہ بیپسی سدھوا انتقال کر گئیں
2 گھنٹے پہلے
