21 ستمبر ، 2022 
کراچی: شاہین فورس نے ڈکیتی کی کوشش ناکام بناکر ملزم کو زخمی حالت میں گرفتارکرلیا
21 ستمبر ، 2022
کراچی پولیس کی شاہین فورس کےگلشن اقبال میں ہونے والے پہلے مقابلے میں زخمی ملزم گرفتار کرلیا گیا۔
ایس ایس پی ایسٹ عبدالرحیم شیرازی کے مطابق یونیورسٹی روڈ پر سمامہ سینٹرکےقریب شہری سے ڈکیتی کے دوران شاہین فورس پہنچ گئی اورکار سوار کو لوٹنے والے موٹر سائیکل سوار ملزمان کو شاہین فورس کے اہلکاروں نے للکارا۔
ایس ایس پی ایسٹ کے مطابق ملزمان نے پولیس پر فائرنگ کی، جوابی فائرنگ کے دوران فرار کی کوشش میں ایک ملزم زخمی ہوا جسےگرفتارکرلیا گیا جب کہ دوسرا ملزم فرار ہونے میں کامیاب ہوگیا۔
ایس ایس پی ایسٹ کا کہنا ہےکہ موٹر سائیکل پر فرار ہونے والے ملزم عمران کی گرفتاری کے لیے چھاپے مارے جارہے ہیں۔
پولیس کا کہنا ہےکہ گرفتار زخمی ملزم عبدالرزاق اس سے قبل بھی خواجہ اجمیر نگری پولیس کے ہاتھوں گرفتار ہوچکا ہے۔
واردات ناکام بنانے کے لیے شاہین فورس کے اہلکاروں کی فوری کارروائی پر ایس ایس پی عبدالرحیم شیرازی نے انہیں شاباش دی ہے۔
