08 اکتوبر ، 2022 
آل راؤنڈرز کی تلاش عبدالرزاق کا ہدف
08 اکتوبر ، 2022
پاکستان کرکٹ ٹیم کے سابق آل راونڈر عبدالرزاق نے پاکستان جونئیر لیگ میں آل راؤنڈرز کی تلاش کو ہدف قرار دیتے ہوئے کہا ہے کہ میں آل راونڈرز کو نظر میں رکھوں گا، امید ہے لیگ سے آل راونڈرز ملیں گے، آل راؤنڈرز تلاش کر کے ان پر کام کروں گا اور ان کی اسکلز میں بہتری لانے کی کوشش کروں گا۔
پاکستان کی جانب سے 46 ٹیسٹ، 265ون ڈے اور 32 ٹی ٹوئنٹی میچز کھیلنے والے سابق آل راؤنڈر عبدالرزاق پاکستان جونئیر لیگ میں حیدر آباد ہنٹرز کے کوچ ہیں۔
عبدالرزاق کا کہنا ہے کہ پاکستان جونئیر لیگ نوجوان کرکٹرز کے لیے ایک پریشر والا ٹورنامنٹ ہے، نوجوان کرکٹرز کو ٹیسٹ سینٹر پر کھیل کر انٹرنیشنل کرکٹ کا ایک احساس مل رہا ہے کیونکہ ابھی انگلینڈ کی کرکٹ ٹیم کھیل کر گئی ہے، معیاری پچز ہیں اور گراونڈ بھی بڑے ہیں، آہستہ آہستہ نوجوان کرکٹرز سیٹ ہو جائیں گے تو لیگ میں بڑے اسکور ہوں گے۔
عبدالرزاق نے بتایا کہ میں کوچنگ کر کے بہت خوش ہوتا ہوں، میدان میں نوجوانوں کے ساتھ عملی طور پر کام کرتا ہوں، کھلاڑیوں کی اسکلز کو بہتر کرنے کے ساتھ ان کو ذہنی طور پر مضبوط بنانا ہے۔
عبدالرزاق ٹی ٹونٹی ورلڈ کپ میں پاکستان ٹیم سے بڑے پر امید ہیں کہتے ہیں کہ پاکستان کرکٹ ٹیم ٹی ٹونٹی ورلڈ کپ میں بہت اچھا پرفارم کرے گی پاکستان ٹیم کو دنیا کی بہترین ٹیم مانتا ہوں ، اس کی وجہ یہ نہیں ہے کہ میں پی سی بی کا ملازم ہوں اور ملازم کی حیثیت سے کہہ رہا ہوں۔
قومی ٹیم کے سابق آل راؤنڈر نے کہا کہ ایشیا کپ اور انگلینڈ کے خلاف سیریز میں بدقسمتی کہ وجہ سے نہ جیت سکے حالانکہ پاکستان کے میچ ونر بیٹرز اور بولرز ہیں اس لیے ٹی ٹوئنٹی ورلڈ کپ میں پاکستان ٹیم اچھا پرفارم کرے گی۔
