09 اکتوبر ، 2022 
کراچی: مختلف واقعات میں 2 افراد ہلاک، 1 زخمی سمیت 5 ملزمان گرفتار، اسلحہ برآمد
09 اکتوبر ، 2022
کراچی میں گزشتہ رات مختلف واقعات میں 2 افراد جان کی بازی ہار گئے جبکہ پولیس کارروائیوں کے دوران ایک زخمی سمیت 5 ملزمان کو گرفتار کرکے اسلحہ، نقدی اور موٹر سائیکلوں سمیت دیگر سامان برآمد کر لیا گیا جبکہ 5 ملزمان فرار ہوگئے۔
کراچی میں کورنگی انڈسٹریل ایریا اور گلشن معمار سے زخمی ملزم سمیت 5 ملزمان کو گرفتار کرلیا گیا، ملزمان اسٹریٹ کرائمز اور موٹرسائیکل لفٹنگ میں ملوث ہیں۔
بلدیہ میں خاتون نے گھر میں مبینہ طور پر خودکشی کرلی جبکہ ڈالمیاں میں ٹریفک حادثے میں 1 شخص جاں بحق ہوگیا۔
پولیس کے مطابق کورنگی انڈسٹریل ایریا میں جناح میڈیکل سینٹر کے قریب مقابلے کے بعد اسٹریٹ کرمنل زبیر کو زخمی حالت میں گرفتار کر لیا گیا ہے جبکہ ملزم کے 5 ساتھی موقعے سے فرار ہوگئے، گرفتار ملزم سے اسلحہ، 5 موبائل فون اور چھینی گئی نقد رقم برآمد کر لی گئی۔
دوسری جانب پولیس کا کہنا ہے کہ گلشن معمار افغان کیمپ میں ٹارگٹڈ آپریشن کے دوران اسٹریٹ کرائم اور ڈکیتی کی وارداتوں میں ملوث 4 ملزمان کو گرفتار کرتے ہوئے ملزمان سے 4 پستول، 2 موٹرسائیکل اور نقد رقم برآمد کر لی گئی ہے۔
پولیس کے مطابق بلدیہ 24 کی مارکیٹ میں 28 سالہ خاتون نے گلے میں پھندا لگا کر مبینہ طور پر خودکشی کرلی ہے تاہم خودکشی کی وجہ معلوم نہیں ہوسکی اس حوالے سے تحقیقات کی جا رہی ہے۔
ریسکیو ذرائع کے مطابق ڈالمیاں روڈ پر بحریہ ٹاؤن قبرستان کے قریب گاڑی کی ٹکر سے 1 شخص جاں بحق ہوگیا، جس کی شناخت نہیں ہوسکی، متوفی کی لاش جناح اسپتال منتقل کردی گئی۔
