11 اکتوبر ، 2022 
عبدالرزاق کے بیٹے کا پسندیدہ آل راؤنڈر کون ہے؟
11 اکتوبر ، 2022
سابق آل راؤنڈر عبدالرزاق کے بیٹے علی رزاق پاکستان جونیئر لیگ میں بہاولپور رائیلز کی نمائندگی کر رہے ہیں جب کہ سابق ٹیسٹ کرکٹر عبدالرزاق حیدر آباد ہنٹرز کے کوچ ہیں۔
علی رزاق اپنے والد کی طرح میڈیم پیس بولنگ بھی کرتے ہیں اور وہ بیٹنگ آل راؤنڈر ہیں۔
علی رزاق نے جیو نیوز سے گفتگو میں بتایا کہ بچپن سے ہی اپنے والد کوکھیلتے دیکھا ہے، ان ہی کو دیکھ کر بولنگ بھی شروع کی، والد شروع سے ہی انسپائریشن ہیں۔
علی رزاق نے بتایا کہ والد ہمیشہ بتاتے ہیں کہ میں نے کہاں غلطی کی اور مجھے کیا کرنا ہے، ابھی وہ دوسری ٹیم کے کوچ ہیں لیکن پھر بھی میچ کے بعد بتاتے ہیں، ڈانٹ بھی پڑتی ہے، یہ تو ساتھ ساتھ چلتی ہے۔
نوجوان آل راؤنڈر نے کہا کہ بیٹنگ میں رکی پونٹنگ سے متاثر ہوں، ان کی ویڈیوز دیکھتا ہوں جبکہ بین اسٹوکس میرے پسندیدہ آل راؤنڈر ہیں ان کو فالو کرتا ہوں۔
انہوں نے کہا کہ میں بین اسٹوکس کی اپنے والد کے سامنے بھی تعریف کرتا ہوں، انہیں برا نہیں لگتا بس وہ مثبت کھیلنے کا کہتے ہیں۔
