کھیل

پاکستان میں ٹی ٹوئنٹی سیریز جیت کر ناقابل یقین احساسات ہیں: کپتان آئرلینڈ ویمن ٹیم

16 نومبر ، 2022

ٹی ٹوئنٹی کرکٹ کیلئے ہم نے ٹیم میں تھوڑی تبدیلیاں کیں، ہم موقعے کے انتظار میں تھے : لاورا ڈیلینی— فوٹو: جیو نیوز

کپتان آئر لینڈ ویمن کرکٹ ٹیم لاورا ڈیلینی کا کہنا ہے کہ پاکستان میں ٹی ٹوئنٹی سیریز جیت کر ناقابل یقین احساسات ہیں۔

آئر لینڈ ویمن کرکٹ ٹیم نے پاکستان ویمن ٹیم کو تین ٹی ٹوئنٹی میچز کی سیریز میں دو ایک سے شکست دی ، آئر لینڈ کی یہ پہلی کوئی کرکٹ ٹیم ہے جس نے پاکستان کا دورہ کیا ، جبکہ آئرش ویمن کرکٹ ٹیم کی بیرون ملک سیریز میں پہلی کامیابی ہے۔

اس سے قبل تین ون ڈے میچز کی سیریز میں پاکستان ویمن نے مہمان ٹیم کو تین صفر سے ہرایا تھا۔

لاورا ڈیلینی نے جیو نیوز کو دیے جانے والے خصوصی انٹرویو میں کہا کہ گزشتہ آٹھ دس ماہ میں خاص طور پر ٹی ٹوئنٹی کرکٹ کیلئے سخت محنت کی ، ون ڈے سیریز کے دوران ہم نے بہت سیکھا اور غلطیوں پر کام کیا، ہمیں اندازہ ہو گیا تھا کہ ٹی ٹوئنٹی سیریز میں ہم نے کیا کرنا ہے۔ ہم نے واضح فرق سے آخری میچ جیتا، پہلے بیٹرز اور پھر بولرز نے اچھا پرفارم کیا۔

آئرش کپتان نے کہا کہ ٹی ٹوئنٹی کرکٹ کیلئے ہم نے ٹیم میں تھوڑی تبدیلیاں کیں، ہم موقعے کے انتظار میں تھے اور اس کافائدہ اٹھانے کیلئے ہم نے محنت کی ہوئی تھی، آئرش کرکٹ کیلئے یہ ایک بڑا موقع ہے کیونکہ آئر لینڈ کی یہ کوئی پہلی ٹیم تھی جس نے پاکستان کا دورہ کیا، ہم نے یہاں ٹی ٹوئنٹی سیریز میں کامیابی حاصل کی جو کہ پہلا موقع ہے ، یہ ہمارے لیے ایک قیمتی موقع ہے، ہم اس جیت کی حقدار تھیں۔

لاورا ڈیلینی نے پاکستان کے دورے کو لاجواب قرار دیا۔ انہوں نے کہا کہ پاکستان کا دورہ ٹیم اور منیجمنٹ کیلئے شاندار تجربہ رہا، لاہور ایک خوبصورت شہر ہے لیکن ہمیں گھومنے پھرنے کا زیادہ موقع نہیں ملا، کرکٹ کا ماحول آئیڈیل تھا، اختتام ہمارا شاندار رہا ہے۔