20 دسمبر ، 2022 
کراچی: کے ایم سی انسپکٹر کے قتل میں ملوث ایک اور ملزم گرفتار
20 دسمبر ، 2022
کراچی: سندھ پولیس کے کاؤنٹر ٹیررازم ڈیپارٹمنٹ (سی ٹی ڈی) نے کے ایم سی انسپکٹر کے قتل میں ملوث ایک اور ملزم کو گرفتار کر لیا۔
ترجمان سی ٹی ڈی کے مطابق ملزم سلمان عرف ہکلا کو کراچی کے علاقے رنچھوڑ لائن میں نشتر روڈ سے گرفتار کیا گیا۔
ترجمان کے مطابق ملزم سلمان سٹی ڈسٹرکٹ کے نبی بخش تھانے میں انسداد دہشتگردی اور دیگر دفعات کے تحت درج مقدمات میں مطلوب اور مفرور تھا، ملزم اور اس کے ساتھیوں نے رواں برس کے ایم سی کے انسپکٹر محمد علی کو فائرنگ کرکے قتل کردیا تھا۔
سی ٹی ڈی حکام نے بتایا کہ گرفتار ملزم کے تین ساتھی کاشف، شاکر اور ابراہیم عرف ٹوپی پہلے ہی گرفتار ہوچکے ہیں جب کہ ملزم گرفتاری سے بچنے کے لیے وقوعے کے روز سے روپوش تھا۔
سی ٹی ڈی کے مطابق ملزم نے مبینہ طور پر انکشاف کیا ہے کہ کے ایم انسپکٹر کے قتل کی منصوبہ بندی ملزم کے گھر پر تیار کی گئی تھی۔
