21 دسمبر ، 2022 
کراچی میں فائرنگ سے پولیس اہلکار جاں بحق،پولیس مقابلے میں ایس ایچ او زخمی
21 دسمبر ، 2022
کراچی کے علاقے کورنگی میں فائرنگ سے ایک پولیس اہلکار جاں بحق ہو گیا جب کہ ایک پولیس مقابلے میں ایس ایچ او میمن گوٹھ زخمی ہو گئے۔
سینئر سپرنٹنڈنٹ پولیس (ایس ایس پی) کورنگی ساجد امیر سدوزئی کے مطابق کورنگی کے علاقے زمان ٹاؤن 51 سی ایریا میں چیکنگ کے دوران پولیس اہلکاروں نے مشتبہ افراد کو روکا۔
ایس ایس پی کورنگی کا بتانا ہے کہ موٹر سائیکلوں پر سوار ملزمان نے پولیس پر فائرنگ کردی جس سے 31سالہ ہیڈکانسٹیبل منظور زخمی ہوا جسے فوری طور پر اسپتال منتقل کیا گیا جہاں پہنچنے تک وہ شہید ہو گئے۔
پولیس کے مطابق اسی علاقے میں گودام چورنگی پر بھی پولیس مقابلے میں ایک پولیس اہلکار زخمی ہوا۔
ادھر میمن گوٹھ تھانے کے ایس ایچ او ادریس بنگش سائٹ سپر ہائی وے کے علاقے میں ایک پراپرٹی ڈیلر کے پاس مبینہ طور پر ڈکیتی کے دوران مقابلے میں زخمی ہوگئے۔
پولیس ذرائع کے مطابق واردات کے دوران سابق ایس ایچ او سائٹ سپر ہائی وے ادریس بنگش نے ملزمان کو پکڑنے کی کوشش کی، فائرنگ کے اس واقعہ میں ایک شہری آصف چانڈیو بھی زخمی ہوا، ملزم کو ادریس نے زخمی حالت میں پکڑ لیا جسے اسپتال منتقل کر دیا گیا ہے۔
علاوہ ازیں ڈی آئی جی ایسٹ مقدس حیدر کے مطابق ایسٹ زون پولیس نے اسٹریٹ کرمنلز کے خلاف متعدد کارروائیاں کیں جس دوران ایک پولیس اہلکار شہید اور ایس ایچ او سمیت 3 زخمی ہوئے۔
