07 جنوری ، 2023 
منی لانڈرنگ کیس: احتساب عدالت نے سلیمان شہباز کی عبوری ضمانت میں توسیع کردی
07 جنوری ، 2023
لاہور کی احتساب عدالت نے منی لانڈرنگ اور آمدن سے زائد اثاثہ جات کیس میں وزیراعظم کے صاحبزادے سلیمان شہباز کی عبوری ضمانت میں 23 جنوری تک توسیع کردی۔
وزیراعظم کے صاحبزادے سلیمان شہباز کے وکیل نے منی لانڈرنگ اور آمدن سے زائد اثاثوں کے کیس میں قومی احتساب بیورو (نیب) کے سوالنامےکا جواب جمع کرانے کے لیے مہلت مانگ لی۔
احتساب عدالت کے فاضل جج نے نیب کے تفتیشی افسر سے استفسار کیا کہ تفتیش کہاں تک پہنچی ہے؟ تفتیشی افسر نے جواب دیا کہ سلیمان شہباز کو سوالنامہ دے دیا ہے، انہوں نے جواب جمع کرانا ہے۔
سلیمان شہباز کے وکیل نے نیب کے سوالنامےکا جواب جمع کرانے کے لیے مہلت مانگ لی۔
عدالت نے سلیمان شہبازکی عبوری ضمانت میں 23 جنوری تک توسیع کرتے ہوئے آئندہ سماعت تک نیب کو بھی تفتیش مکمل کرنےکا حکم دے دیا۔
اس سے قبل سلیمان شہباز اسپیشل کورٹ سینٹرل لاہور میں پیش ہوئے جہاں سلیمان شہباز کی عبوری درخواست ضمانت پر سماعت ہوئی ۔
سلیمان شہباز کے وکیل کا کہنا تھا کہ سلیمان شہباز گذشتہ روز شامل تفتیش ہوگئے ہیں، عدالت نے پراسیکیوٹر سے استفسار کیا کہ آپ 15 دن کیا کرتے رہے؟ جس پر پراسیکیوٹر نے جواب دیا بہت سی چیزیں ہیں ، تھوڑا وقت مل جائےتو بہترہوگا۔
سلیمان شہباز کے وکیل امجد پرویز کا کہنا تھا کہ اب دیکھنا ہےکہ منی لانڈرنگ کا جرم بنتا ہے یا نہیں۔
عدالت نے ایف آئی اے کو تحقیقات مکمل کرنے کے لیے 15 دن کا وقت دیتے ہوئے آئندہ سماعت پر رپورٹ جمع کروانے کا حکم دے دیا اور سلیمان شہباز کی عبوری ضمانت میں بھی 21 جنوری تک توسیع کردی۔
