04 فروری ، 2023 
پشاور پولیس لائن حملہ آور کی سہولت کار کے ساتھ تصویر منظر عام پر آگئی
04 فروری ، 2023
پشاور کی پولیس لائن مسجد میں خودکش دھماکے کی تحقیقات میں کاؤنٹر ٹیررازم ڈپارٹمنٹ (سی ٹی ڈی) اور پولیس ٹیم نے اہم پیش رفت کی ہے۔
پولیس لائن حملہ آور کی سہولت کار کے ساتھ تصویر منظر عام پر آگئی ہے، مبینہ حملہ آور کی رنگ روڈ پر موجودگی اور سہولت کار کے ساتھ تصویر سامنے آئی ہے۔
پولیس ذرائع کے مطابق سہولت کار موٹر سائیکل چلارہا ہے جبکہ مبینہ حملہ آور پیچھے بیٹھا ہے۔
پولیس ذرائع کے مطابق خودکش حملہ آور کو سہولت کار نے رنگ روڈ پر پہنچے میں مدد فراہم کی، مبینہ حملہ آور رنگ روڈ کے راستے جی ٹی روڈ پر داخل ہوا۔
پولیس ذرائع کے مطابق سہولت کار جمیل چوک سے آگے رِنگ روڈ پر موٹرسائیکل سے اترگیا۔
خیال رہے کہ ہفتے کو پولیس لائنز کی مسجد میں ہونے والے خود کش دھماکے میں 100 سے زائد نمازی شہید ہوئے تھے جن میں اکثر پولیس اہلکار تھے جبکہ مبینہ حملہ آور پولیس کی وردی پہن کر مسجد میں داخل ہوا تھا۔
