19 فروری ، 2023 
داسو ہائیڈرو پاورپراجیکٹ سائٹ پر دریائےسندھ کا رُخ موڑ دیا گیا
19 فروری ، 2023
صوبہ خیبر پختونخوا کے ضلع اپر کوہستان میں زیر تعمیر داسو ہائیڈرو پاورپراجیکٹ نے اہم سنگ میل عبورکرلیا۔
ترجمان واپڈا کے مطابق داسو ہائیڈروپاورپراجیکٹ سائٹ پر دریائےسندھ کا رُخ موڑ دیا گیا ہے، پراجیکٹ سائٹ پر دریائے سندھ قدرتی گزر گاہ کے بجائے اب ڈائیورژن ٹنل سے گزر رہا ہے۔
ترجمان واپڈا کے مطابق دریا کا رُخ موڑنے کے بعد عارضی ڈیم پر تعمیراتی سرگرمیاں شروع کردی گئی ہیں، عارضی ڈیم مکمل ہونے پر داسو پراجیکٹ کے مین ڈیم کی تعمیر شروع ہوجائےگی۔
واپڈا ترجمان کا کہنا ہے کہ پراجیکٹ کی زیر تعمیر دوسری ڈائیورژن ٹنل بھی اپریل کے وسط تک مکمل ہوجائےگی، ہائی فلو سیزن کے دوران دریائے سندھ کا پانی دونوں ڈائیورژن سےگزرےگا، 4 ہزار 320 میگاواٹ کا داسو ہائیڈرو پاور پراجیکٹ دو مراحل میں مکمل کیا جا رہا ہے۔
ترجمان واپڈا کے مطابق منصوبے کے پہلے مرحلے سے بجلی کی پیداوار 2026 میں شیڈول ہے۔
دریائے سندھ کا رُخ موڑنے پر چیئرمین واپڈا سجاد غنی کی جانب سے پراجیکٹ انتظامیہ کو مبارک باد دی گئی ہے۔
