19 فروری ، 2023 
کراچی کے واحد پولیس اسپتال کی سکیورٹی بڑھانے کی درخواست
19 فروری ، 2023
کراچی پولیس ہیڈ کوارٹر پر دہشت گردوں کے حملے کے بعد سندھ کے واحد پولیس اسپتال گارڈن کراچی کی انتظامیہ نے سکیورٹی بڑھانے کی درخواست کردی۔
پولیس اسپتال کے میڈیکل سپرینٹنڈنٹ (ایم ایس) ڈاکٹر مظفر علی جاکھرانی نے سکیورٹی بڑھانے کیلئے ایڈیشنل انسپکٹر جنرل (اے آئی جی) ویلفیراور سی پی او کو خط کو لکھ دیا، خط میں انتظامیہ سے تین شفٹوں میں 12-12 سکیورٹی گارڈ تعینات کرنے کی اپیل کی گئی۔
خط کے متن کے مطابق اسپتال انتظامیہ کی جانب سے درخواست کی گئی ہے کہ اسپتال میں سکیورٹی کیلئے میٹل ڈیٹیکٹرز، بیرئیرز اور واک تھرو گیٹس بھی نصب کیے جائیں۔
پولیس اسپتال کے ایم ایس نے اپنے خط میں لکھا کہ اسپتال میں بڑی تعداد میں اہلکار اور ان کے اہلخانہ علاج کیلئے آتے ہیں، موجود سکیورٹی صورتحال میں اسپتال میں اہلکاروں اور اہلخانہ کی سکیورٹی ضروری ہے۔
گارڈن پولیس اسپتال کی انتظامیہ کا کہنا ہے کہ یہ پولیس اہلکاروں اور افسران کیلئے کراچی میں سندھ پولیس کا واحد اور جدید اسپتال ہے، روزانہ 3 سو سے زائد مریض ایمرجنسی اور او پی ڈی میں رپورٹ ہوتے ہیں۔
