کھیل

پاکستان چیمپئنز ٹرافی پر تحریری گارنٹی لیکر ورلڈ کپ کھیلنے آئے گا: بھارتی میڈیا

06 مئی ، 2023

پی سی بی بھارتی بورڈ کے اعلیٰ عہدیدار جے شاہ سے آئی سی سی چیمپئنز ٹرافی میں شرکت کی تحریری گارنٹی مانگے گا: بھارتی میڈیا کا دعویٰ— فوٹو: فائل

پاکستان کی بھارت میں ہونے والے آئی سی سی ورلڈ کپ میں شرکت کے حوالے سے بھارتی میڈیا نے دعویٰ کیا ہے کہ بھارتی کرکٹ بورڈ نے تحریری گارنٹی دی تو پاکستان ورلڈ کپ کھیلنے بھارت آئے گا۔

بھارتی میڈیا کا کہنا ہے کہ پاکستان کرکٹ بورڈ (پی سی بی) بھارتی بورڈ کے اعلیٰ عہدیدار جے شاہ سے آئی سی سی چیمپئنز ٹرافی میں شرکت کی تحریری گارنٹی مانگے گا۔ پی سی بی کے چیئرمین نجم سیٹھی ورلڈ کپ کیلئے ٹیم بھیجنے سے قبل تحریری گارنٹی لیں گے۔

آئی سی سی چیمپئنز ٹرافی 2025کی میزبانی پاکستان کے پاس ہے۔ بھارتی میڈیا کے مطابق ایشین کرکٹ کونسل (اے سی سی) کے سربراہ جے شاہ نے ایشیا کپ کیلئے ہائیبرڈ فارمولے کی تصدیق نہیں کی، نجم سیٹھی دبئی میں آئندہ ہفتے کے دوران اے سی سی اور آئی سی سی عہدیداران سے ملاقات کر رہے ہیں۔

بھارتی میڈیا کے مطابق نجم سیٹھی یہ لابی بھی کریں گے کہ پاکستان بھارت میں ورلڈ کپ اس وقت تک کھیلنے نہیں جائے گا جب تک آئی سی سی اور بھارتی بورڈ تحریری گارنٹی نہیں دیں گے۔

بھارتی میڈیا کے مطابق پاکستان نے ایشیا کپ کے پاکستان اور دبئی میں نہ ہونے کی صورت میں ایشیا کپ میں شرکت کے معاملے پر اپنی حکومت سے ایڈوائس مانگی ہے، چیئرمین نجم سیٹھی ایشیا کپ کیلئے ہائیبرڈ فارمولے کے علاوہ کوئی آپشن یا فیصلہ قبول نہیں کریں گے۔

بھارتی میڈیا کا یہ بھی دعویٰ ہے کہ ایشیا کپ کہیں اور منعقد کرنے کا فیصلہ ہوا تو پاکستان اس میں شرکت نہ کرنے کا اعلان کرے گا، پاکستان کرکٹ بورڈ زور ڈالے گا کہ ایشیا کپ حوالے سے تاخیر نہ کی جائے جلد وینیوز اور شیڈول کا اعلان کیا جائے۔