09 مئی ، 2023 
ٹاپ ٹیمیں پاکستان آکر کھیل چکی ہیں اب بھارت کا نہ آنے کا کوئی جواز نہیں بنتا: سرفراز
09 مئی ، 2023
پاکستان کرکٹ ٹیم کے سابق کپتان سرفراز احمد نے کہا ہے کہ چھ سات سال میں پاکستان میں انٹرنیشنل کرکٹ کی بحالی کیلئے بہت کام کیا گیا تھا، ٹاپ ٹیمیں پاکستان آکر کھیل چکی ہیں اب بھارت کا یہاں نہ آنے کا کوئی جواز نہیں بنتا۔
کراچی میں جناح کالج گراؤنڈ کے افتتاح کے موقع پر میڈیا سے گفتگو کرتے ہوئے انہوں نے کہا کہ جس ایونٹ کا میزبان پاکستان ہے وہ ایونٹ پاکستان میں ہی ہونا چاہیے.
انہوں نے کہا کہ انٹرنیشنل کرکٹ کونسل اور ایشین کرکٹ کونسل کو اس معاملے پر پاکستان کی مدد کرنی چاہیے، تقریباً ہر ٹیم پاکستان آرہی ہے، یہ پاکستان کا حق بنتا ہے کہ جو کرکٹ پاکستان کو ملی وہ پاکستان میں ہی ہو۔
سرفراز احمد نے مزید کہا کہ پاکستان نے انٹرنیشنل کرکٹ کی بحالی کیلئے بہت جدوجہد کی ہے مشکل وقت بھی دیکھا ہے، ملک میں کرکٹ کی بحالی کیلئے پاکستان کرکٹ بورڈ، میڈیا، سکیورٹی فورسز اور ایجنسیوں کے کردار کو فراموش نہیں کیا جاسکتا۔
انہوں نے کہا کہ بھارت کے پاکستان نہ آنے پر ہر اس ٹیم کو پاکستان کی سپورٹ کرنی چاہیے جو یہاں آکر کرکٹ کھیل چکی ہے، پاکستان کی مہمان نوازی بہت مشہور ہے اور اس کی مثال دنیا میں نہیں ملتی۔
سابق کپتان نے کہا کہ یہ بات ہی نہیں ہونی چاہیے کہ بھارت پاکستان نہیں آئے گا جس طرح اسٹیو اسمتھ جو روٹ دنیا کے صف اول کے کرکٹر یہاں کھیل کر گئے اسی طرح پاکستان کے لوگ بھارت کو بھی کھیلتا دیکھنا چاہتے ہیں اور پاک بھارت کے میچز دیکھنا چاہتے ہیں۔
مزید خبریں :
لاہور قلندرز نے ڈیرن گوف کو ہیڈ کوچ مقررکردیا
8 گھنٹے پہلے
ورلڈ اسنوکر چیمپئن شپ، آصف نے فیصلہ کن راؤنڈ میں جگہ بنالی
01 نومبر ، 2024
