20 مئی ، 2023 
سابق رکن قومی اسمبلی ملک جواد حسین کا بھی پی ٹی آئی چھوڑنے کا اعلان
20 مئی ، 2023
خیبرپختونخوا میں جمعہ کے روز پاکستان تحریک انصاف کے سابق صوبائی وزیر اقبال وزیر کے بعد قبائلی ضلع اورکزئی کے سابق رکن قومی اسمبلی ملک جواد حسین نے بھی پارٹی چھوڑنے کا اعلان کردیا۔
ملک جواد حسین نے جیو نیوز کو ٹیلیفون پر بتایا کہ 9 مئی واقعات کو دیکھ کر انتہائی مایوسی ہوئی، سیاست کیلئے فوجی تنصیبات اور سرکاری املاک کو جلانا قابل مذمت ہیں۔
انہوں نے 9 اور 10 مئی کے پرتشدد واقعات کی مذمت کرتے ہوئےکہا کہ میں نے پی ٹی آئی کے ساتھ اپنے دور میں وفاداری کی، عمران خان کے کہنے پر قومی اسمبلی سے استعفیٰ بھی دیا تھا۔
ملک جواد حسین نے 9 مئی کے واقعات کی مذمت کرتے ہوئے کہا کہ وہ بغیر کسی دباؤ کے پی ٹی آئی چھوڑنے کا اعلان کرتے ہیں ۔
ان کا کہنا تھا کہ یہ ادارے اور ملک ہماراہے،جب ادارے مضبوط ہوں تو پاکستان مضبوط ہوگا، انہوں نے اپنے ووٹرز ، علاقہ عمائدین کے ساتھ صلاح و مشورے کے بعد آئندہ لائحہ عمل طے کرنے کا اعلان کیا۔
گزشتہ روز پاکستان تحریک انصاف خیبرپختونخوا کے رہنما و سابق صوبائی وزیر اقبال وزیر نے پارٹی چھوڑنے کا اعلان کیا تھا۔
پشاور میں پریس کانفرنس کرتے ہوئے اقبال وزیر کا کہنا تھاکہ پی ٹی آئی حکومت نے مجھے صوبائی وزیر برائے ریلیف بنایا تھا، ہرموقع پرپارٹی سے وفاداری کا ثبوت دیا، 9 مئی کودلخراش واقعات پیش آئے۔
