کراچی … کراچی کے علاقے کینٹ اسٹیشن کے باہر مسافر بس میں زور دار دھماکا ہوا ہے، جس میں 3 افراد جاں بحق اور 40 زخمی ہوگئے ہیں، جبکہ متعدد گاڑیوں اور قریبی دکانوں کو بھی شدید نقصان پہنچا ہے۔ نمائندگان جیو نیوز کے مطابق کینٹ اسٹیشن کے باہر مسافر بس میں زور دار دھماکا ہوا ہے جس سے بس مکمل طور پر تباہ ہوگئی، دھماکے میں خواتین اور بچوں سمیت متعدد افراد زخمی ہوگئے جنہیں ایمبولینسوں کے ذریعے اسپتال منتقل کیا جارہا ہے تاہم ان میں کئی کی حالت تشویشناک ہے۔ ایم ایس جناح اسپتال سیمی جمالی نے 3 جاں بحق افراد 40 زخمیوں کو اسپتال منتقل کرنے کی تصدیق کی ہے۔ دھماکے سے بس کی چھت اڑ گئی اور اس میں آگ لگ گئی جبکہ قریب کھڑی موٹر سائیکل تباہ ہوگئی، دھماکے سے قریبی دکانوں اور عمارتوں کو بھی نقصان پہنچا اور شیشے ٹوٹ گئے، کئی گاڑیوں ، ٹھیلوں اور پتھاروں میں آگ لگ گئی، دھماکے کے بعد علاقے میں دھویں کے بادل پھیل گئے اورافراتفری پھیل گئی۔ پولیس اور دیگر سیکیورٹی اداروں نے دھماکے کی جگہ کو گھیرے میں لے لیا جبکہ امدادی کارروائیاں جاری ہیں۔ دوسری جانب واقعے کے کافی دیر گزرنے کے بعد فائر بریگیڈ کا عملہ آگ بجھانے پہنچا، دھماکے کے بعد بسوں میں نصب گیس سلنڈر بھی پھٹنا شروع ہوگئے ہیں جس سے مزید نقصان کا خدشہ ہے۔