طوفان کے قریب پہنچتے ہی کمرشل فلائٹس کو روک دیا جائے گا: شیری رحمان

وفاقی وزیر برائے موسمیاتی تبدیلی شیری رحمان نے کہا ہے کہ طوفان کے باعث آج چھوٹے جہازبند کرنے کا فیصلہ کیا گیا ہے اور طوفان کے قریب پہنچتے ہی کمرشل فلائٹس کوبھی روک دیا جائے گا۔

پریس کانفرنس کرتے ہوئے شیری رحمان کا کہنا تھاکہ کل دن 11 بجے سمندری طوفان کیٹی بندر سے ٹکرائے گا لہٰذا لوگوں سے اپیل ہے انتظامیہ کے ساتھ تعاون کریں، پیٹرولنگ ریلیف اور ریسکیو کے لیے تمام ادارے متحرک ہیں اور 66 ہزار افراد کو محفوظ مقام پر منتقل کردیا گیا ہے۔

انہوں نے اپیل کی کہ لوگ ساحلی علاقوں کی طرف طوفان کو دیکھنے کیلئے جا رہے ہیں، مہربانی فرما کر یہ ڈیزاسٹر ٹورازم بند کریں۔

ان کا کہنا تھاکہ مہربانی فرما کر عوام ٹک ٹاک بنانے کے لیے ساحلی علاقوں میں مت جائیں، بار بار شکایات موصول ہو رہی ہے، عوام کو بار بار روک رہے ہیں۔

سمندری طوفان بپر جوائے کا رخ تبدیل، کراچی کے ساحل سے دور ہونے لگا

طوفان کا کراچی سے فاصلہ 340 سے بڑھ کر 370 کلومیٹر ہوگیا، کیٹی بندر سے طوفان کا فاصلہ 275 سے بڑھ کر 290 کلو میٹر ہوا تاہم طوفان کیٹی بندر سے ٹکرانے کا خطرہ اب بھی موجود ہے

شیری رحمان کا کہنا تھاکہ طوفان کراچی کے ساحل سے نہیں ٹکرائے گا، طوفان کے باعث آج چھوٹے جہازبند کرنے کا فیصلہ کیا گیا ہے اور طوفان کے قریب پہنچتے ہی کمرشل فلائٹس کوبھی روک دیا جائے گا۔

دوسری جانب نیشنل ڈیزاسٹر منیجمنٹ اتھارٹی (این ڈی ایم اے) کے چیئرمین  لیفٹیننٹ جنرل انعام حیدر ملک کا کہنا تھاکہ ایسا فیزبھی آسکتا  ہے کہ جہاں منتقل کیا گیا وہاں سے کہیں اور بھی منتقل کیا جا سکتا ہے، بتایا گیا کہ 300 ملی میٹر تک بارش ہو سکتی ہے۔

انہوں نے کہا کہ ہوسکتا ہے کچھ علاقے ریلیف کیمپس کیلئے مناسب نہ ہوں، کیٹی بندر میں 10 ریلیف کیمپس ہیں، انتظامات کیے گئے ہیں ،کشتیوں کا بھی بندوبست کیا ہے۔

خیال رہے کہ بحیرہ عرب کے سمندری طوفان کا رخ بدل گیا، بپر جوائے کراچی کے ساحل سے دور ہونے لگا۔

محکمہ موسمیات کے مطابق طوفان کا کراچی سے فاصلہ 340 کلومیٹر سے بڑھ کر 370 کلومیٹر ہوگیا ہے جبکہ کیٹی بندر سے طوفان کا فاصلہ 275 کلومیٹر سے بڑھ کر 290 کلو میٹر ہوا ہے تاہم کیٹی بندر ساحل سے طوفان کے ٹکرانے کا خطرہ اب بھی موجود ہے۔

محکمہ موسمیات کا بتانا ہےکہ بپرجوائے کراچی کے ساحل سے نہیں ٹکرائے گا لیکن طوفان کا اثر نظر آئے گا۔