23 جون ، 2023 
ڈاکٹر سعید الدین حیدرآباد میں قائم ہونے والی پہلی وفاقی یونیورسٹی کے وائس چانسلر مقرر
23 جون ، 2023
حیدرآباد میں قائم ہونے والی پہلی وفاقی یونیورسٹی، حیدرآباد انسٹیٹیوٹ فار ٹیکنالوجی اینڈ مینجمنٹ سائنسز میں ڈاکٹر سعید الدین کو ریکٹر/وائس چانسلر مقرر کردیا گیا۔
وفاقی وزارت تعلیم کی جانب سے جاری نوٹیفکیشن کے مطابق ان کی تقرری 4 برس کیلئے کی گئی ہے، تلاش کمیٹی کی جانب سے بھیجے گئے ناموں میں ڈاکٹر سعید الدین کا نام پہلے نمبر پر تھا۔
ڈاکٹر سعید اس وقت چیئرمین انٹربورڈ کراچی کے عہدے پر فائز ہیں، وہ چیئرمین میٹرک بورڈ کراچی اور ریجنل ڈائریکٹر کالجز میرپورخاص کے عہدوں پر بھی خدمات سر انجام دے چکے ہیں۔
صوبائی حکومت کی آمادگی کے بعد امکان ہے کہ ڈاکٹر سعید دونوں عہدوں چیئرمین انٹر بورڈ کراچی اور ریکٹر حیدرآباد یونیورسٹی کا چارج اپنے پاس ہی رکھیں گے۔
ڈاکٹر سعید الدین نے میٹرک بورڈ میں سرٹیفیکٹ کے جلد اجراء اور آن لائن ایڈمٹ کارڈز جاری کرنے جیسے انقلابی اقدامات بھی کیے جنہیں تعلیمی حلقوں میں بے حد سراہا گیا تھا۔
ڈاکٹر سعید الدین انٹر بورڈز چیئرمین کمیٹی کے سربراہ بھی رہ چکے ہیں جبکہ انہیں مختلف ممالک کے تعلیم و کھیل سے متعلق دوروں میں پاکستان کی نمائندگی کا بھی اعزاز حاصل ہے۔
